လိက်အုပ်ဗဂဵုလဟဵုဘဝ ကေုာံၚုဟ်မးမၞိဟ်
(နိဒါန်လိက်)
လိက်အုပ်ဍောတ်ဏံဝွံ ပ္ကောံလဝ်မအရေဝ်မိယာဲမွဲကေၚ်ဒၠောံဗ္တောန်လဝ်ပိုဲကောန်တံနာနာသာ်တုဲ တ္ၚဲဏံဗှ်သၞာမိယာဲမွဲကီုလေဝ် ဆဂးလဇုဲအာယျ၊ ဟိုတ်ဒှ်သာ်ဂှ်တုဲ ကူချပ်ဂွံအာမအရေဝ်မိယာဲမွဲတုဲ စဵုကဵုတ္ၚဲဏံသုၚ်စောဲစကာတုဲ ဒှ်ဖဵုခိုဟ်ဂတာပ်အခေတ်သွက်ပိုဲကောန်တံကွေံကွေံကီုရ၊ ၜိုန်ရမအရေဝ်မိယာဲဒၠောံဗ္တောန်လဝ်တ္ၚဲတေံလောန်ကၠုၚ်ၜိုတ်ပိုစှော်သၞာံကီုလေဝ် သုၚ်စောဲစကာဒှ်ဒၟံၚ်ဖဵုစဵုကဵုတ္ၚဲဏံရ၊ ဆမအရေဝ်ဒၠောံဗ္တောန်လဝ်သၟးဟွံသေၚ်တုဲ ဂုဏ်မိယာဲမွဲဇၞော်ဒၟံၚ်ၜိုတ်ဂလိုၚ်လဵုဂှ်လေဝ်ပါ်ပ္တိတ်သောၚ်လဴကဵုကၠးကၠးဏောၚ်၊ ဂၠးတိဏံညးဂှ်သိုၚ်မာန်ပ္တိုန်လဝ်ဂှ်လေဝ် ဒှ်မိယာဲမွဲဏောၚ်ဂှ်လေဝ် သောၚ်လဴကဠးကဵုဏောၚ်၊ ဗဟုသုတနူကဵုလိက်အုပ်ဍောတ်ဏံဂှ် ဒှ်ပရၚ်တဲပါ်ပရအ်ကဵုကောန်ဂကူတံသၟတ်တ္ၚဲဏံ ဒးဒှ်သ္ကံတဲခိုဟ်မွဲတုဲ မအရေဝ်ဂတာပ်အခေတ်လောဲသွာအိုတ်ရုဲစှ်ဗှ်ဂွံဇၟာပ်အဝဲဍောတ်လဒေါဝ်ဇၞော်ဗျုဖ္အိုတ်ကီုရ၊ အခိၚ်ပိုဲတံတီဟိုတ်ဖဵုဘဝမွဲသာ်ဏံဏောၚ်ဟာတုဲ ဂွံဆာန်တိုန်ဘဝပိုဲ ဂွံဆာန်တိုန်ဂကောံအိန်ထံၚ်ပိုဲ ဂွံဆာန်တိုန်ညးမၞုံဗွဳဗွိုၚ်ပိုဲတံသီုညးဖ္အိုတ်တံဂှ်တုဲ လၟေၚ်လၟေၚ်တ္ၚဲအရာသုၚ်စောဲဘဝပိုဲကောန်ဂကူတံဂှ်ပၠန်လေဝ် ဟွံမွယ်ကဵုဓဝ်မ္ၚိုဟ်ကြံၚ် ဟွံမွယ်ကဵုပြသၞာဇၞော်ဇၞော်စဵုကဵုသှ်ပဠးပ္တိတ်ဟွံမာန်တုဲ ဒှ်နဲကဲပဠေဝ်စိုတ်ပဠေဝ်ဘဝလေဝ်ဟီုစဂွံအိုတ်ရ၊ ယဝ်ရပိုဲတံဒှ်ကောန်ဂကူဗုဒ္ဓဘာသာမွဲဍာံမ္ဂးတှ်ေ လိက်အုပ်ဍောတ်ဏံမွဲအုပ်ဂှ်လေဝ် ဒှ်အၚာပ်စိုတ်သွက်ပိုဲကောန်ဂကူတံတုဲ ဒှ်သွက်ညံၚ်ကဵုပိုဲတံဂွံကွာ်ဗက်အာဂၠံၚ်ဍာန်အပါပိုဲဗုဒ္ဓမွဲတပ်တပ်မွဲတၞုၚ်ကီုရ၊ လိက်အုပ်ဍောတ်ဏံဂှ် ၜိုန်ရဒှ်မုက်လိက်ဟွံဂၠိုၚ်ကီုလေဝ် ပ္ကောံလဝ်မအရေဝ်အရာကူချပ်ခိုဟ်အိုတ်မွဲသွက်ဘဝကီု၊ ပ္ကောံချူကဵုလဝ်အရာဂတာပ်အခေတ်ညံၚ်သ္ဂောံစှ်ေကဵုဗဗွဲဓဝ်သၞောဝ်ဗုဒ္ဓဘာသာခိုဟ်အိုတ်ကီုတုဲ ဒှ်တဴလိက်ဂတာပ်အခေတ်ဗီုအၚာပ်စိုတ်ကောန်ဂကူတံရ၊ ဟိုတ်ဒှ်သာ်ဂှ်တုဲ လ္ပမံၚ်လအ်လ္ပဖအိုတ်အခိၚ်တုဲ ပံက်လုပ်ဗှ်ဖျုန်လိက်အုပ်ဏံအိုတ်စိုအ် ။
(မိဟီုမ္ဂးဂှ်ဗီုလဵုရော)
ယဝ်ရပိုဲတံအာသၟာန်မၞိဟ်ဏောၚ်ဟီုတှ်ေ ဟိုတ်ဖဵုနာနာဗီုညးကဵုညးသှ်လဴအိုတ်ကီုရ၊ ဒှ်တဴသံသယဟွံတီဓဝ်ဍာံစကွေံတုဲ ပိုဲတံထေက်ကြိုက်ဒးသၟာန်သတ်နွံကဵုလမျီုနာနာမာန်ရ၊ သဘာဝဒှ်ကၠုၚ်တုဲ သတ်နွံကဵုလမျီုတံဂှ်လေဝ် ထေက်ကဵုဒးနွံမိယာဲမွဲတုဲ ဒၞာဲဏံဟေၚ်ရပိုဲတံဒးအာသၟာန်ပါ်ပဲါဓဝ်ဍာံပ္ဍဲအရာသတ်နွံကဵုလမျီုထေက်ရ၊ ပိုဲအာသၟာန်သာ်ဏံဂှ် ဒှ်ဟွံတီဂုဏ်အပါဟွံသေၚ်ပုဟ်ဏး၊ ယဝ်ရပိုဲတံသၟာန်စိုပ်အာမိယာဲမွဲဟီုဂှ်ဗီုလဵုရော၊ ဒှ်တဴမၞိဟ်ဗီုလဵုရောသွက်ကောန်တံ၊ ၚုဟ်မးနွံၜိုတ်လဵုလ္တူသတ်နွံကဵုလမျီုသီုဖအိုတ်ဂှ်ကီုတုဲ ပိုဲတံထေက်ကဵုဒးပါ်ပဲါစမ်ဝေၚ် ဒးလ္ၚတ်ဗ္စာရဏာရံၚ်ဂှ်ကီုတုဲ သဘာဝဟီုဂှ် ဒှ်နွံသာ်လဵုထေက်ကဵုပိုဲတံဒးတီလဝ်အိုတ်ညိ။
ပိုဲတံအာသၟာန်ကောန်စာၚ်ဍောတ်ဍောတ်တံဟီုဂှ်တှ်ေ '''ဟေကောန်စာၚ်တံ မိယာဲဟီုဂှ်ဗီုလဵုရော?''' ကောန်စာၚ်တံဂှ်လေဝ် ကလေၚ်သွဟ်လဴကဵုဂှ်ပၠန်တှ်ေ မိဟီုဂှ်ဒှ်ညးသ္ပလဝ်ကၟဳစိၚ်ကဵုပိုဲကောန်တံဟွံဒးဍာ်ဗြဲကီု၊ အခိၚ်ဗြဲဂူကျာထတ်ၜိုဟ်ဂံက်တံဂှ်လေဝ် မိယာဲပိုဲမွဲဟေၚ်ရအုပ်ဓလီုဂဒပ်လဝ်ပိုဲကောန်တံဂွံဗၠးဘဲအန္တရာယ်နာနာမာန်ရ၊ ညးလဵုကၠုၚ်ကဵုဒဒိုက်ကဵုပိုဲဟွံဂွံတုဲ မိယာဲပိုဲမွဲညးမၚ်မွဲစဵုဒၞာဲလဝ်ရ၊ ဣဏံဟီုဂှ်ဒှ်မိယာဲပိုဲတံကီုရအဴ၊ ကောန်စာၚ်ဍောတ်ဍောတ်တံဂှ် ဍေံတံတီကေတ်ၜိုတ်ဆဏံကီုရ၊ သၟာန်အဒါသၟာန်ဂစေံတံလေဝ် သွဟ်ဍေံတိတ်ကၠုၚ်သာ်ဏံဖအိုတ်ရ၊ အပါဟီုဂှ်ဗီုလဵုဍေံတံကေတ်ဟွံဒးပုဟ် သာ်ဏံဗွဲတုန်။
ပိုဲတံအာသၟာန်ကောန်ကၠဵုဍောတ်ဍောတ်တံဟီုဂှ်ပၠန်တှ်ေ '''ဟေကောန်ကၠဵုတံ မိယာဲဟီုဂှ်ဗီုလဵုရော?''' ကောန်ကၠဵုတံဂှ်လေဝ် ကလေၚ်သွဟ်လဴကဵုဂှ်ပၠန်တှ်ေ မိဟီုဂှ်ဒှ်ညးမၚ်မွဲလွဳပရာလဝ်ပိုဲတုဲ ဟွံကဵုမၞိဟ်ကၠုၚ်လုပ်ရပ်ပိုဲကောန်ကၠဵုတံဏံကီုရ၊ ယဝ်လုပ်ကၠုၚ်တှ်ေမိယာဲပိုဲကဳတုဲ ယဝ်ရပ်ပိုဲတှ်ေ မိယာဲပိုဲကိတ်တဴတုဲ မၚ်မွဲလဝ်ပိုဲကောန်တံဟွံပိုတ်သ္ကုတ်ရ၊ တက်ၜုၚ်ကေတ်မာန်ပိုဲဟွံလောဲတုဲ မိယာဲပိုဲညးပြိုၚ်ပ္ကာန်တဴတွဵုရ၊ ဣဏံဟီုဂှ်သၟာန်ကောန်ကၠဵုတံရ။
ကောန်စာၚ်ကောန်ကၠဵုကၠောန်အဒါတံဂှ်ဍေံတီမိယာဲဍေံမွဲဟေၚ်ရ၊ '''မိယာဲမွဲရဒှ်ညးမၚ်မွဲလွဳပရာဂၠာဲဗ္စစၞအဟာရလၟိုန်အခိၚ်အခါတုဲ''' ဂုဏ်မိယာဲဟီုဂှ်ပ္တောံၜိုတ်ဟွံမာန်ကီုရသွက်ကောန်စာၚ်ကောန်ကၠဵုကောန်အဒါတံရ၊ မွဲဘွဍေံတံဂှ်တှ်ေ နွံဆမိယာဲမွဲတုဲ ကျာယီုလုပ်ယီုတိတ်ဍေံတံဂှ်လေဝ်တီဆမိယာဲမွဲကီုရ၊ ယဝ်ပိုဲသၟာန်သာ်ဏံတုဲတှ်ေ ဂုဏ်ဖဵုမိယာဲဟီုဂှ်ဆဵုကၠုၚ်သွဟ်ရဟွံသေၚ်ဟာ။
ဗွဲလက္ကရဴဏံဂှ်တှ်ေ သၟာန်အဲညးချူလိက်ဏံညိ၊ '''ဟေဝိညာဏ်ထဝ် မိဟီုမ္ဂးဂှ်ဗီုလဵုရော?''' အဲညးချူလိက်ဏံလေဝ် သွဟ်ကဵုသောၚ်သောၚ်ကၠးကၠး ဂွံကၠုၚ်လဝ်ဒ္ဂေတ်ပွစဳပၞောန်အရာနာနာနူကဵုမိယာဲမွဲတုဲ သွက်သ္ဂောံသုၚ်စောဲအာပ္ဍဲဘဝလၟေၚ်လၟေၚ်တ္ၚဲဏံမာန်ဂှ်ဂၠိုၚ်နူအပါမွဲဏီရ၊ ရံၚ်စမ် မိယာဲမွဲဆာန်ကောန်ဂၠိုၚ်နူကဵုအပါမွဲဏီရ၊ ယဝ်ရဒးသၟာန်အဲညးချူလိက်ဏံတှ်ေသွဟ်ကဵုသာ်ဏံရ၊ လ္ပပတှ်ေတဴလေဝ်မုဟွံဒှ်ပုဟ် အိန်ထံၚ်လ္ၚဵုတံဂှ်ပၠန်လေဝ် အပါဆာန်ကောန်ဂၠိုၚ်နူမိယာဲတံဂှ်လေဝ်နွံရ၊ ဗၠေတ်ဒးဟွံမွယ်တုဲ ပါ်ပဲါဗ္စာရဏာအိုတ်ညိ၊ ယဝ်ရမိယာဲဟွံမွယ်မ္ဂးတှ်ေ လိက်ကောန်ဂကူတံဂွံဗှ်မံၚ်တ္ၚဲဏံဂှ်လေဝ်ဟွံမွယ်ကီုရ၊ ယဝ်ရဒးသၟာန်အဲတှ်ေ မိယာဲအဲညးချူလိက်ဏံဒှ်ဒၟံၚ်ဗီုဏံ၊ ဘဝမွဲဂွံပြံၚ်သၠာဲအာဗီုဒှ်နွံဒၟံၚ်ပ္ဍဲစက္ကဏံဂှ်တှ်ေ ဂွံကၠုၚ်ဂဥုဲဒြဟတ်နူမိယာဲမွဲဂၠိုၚ်နူအပါဏီရ။
မိယာဲဟီုမ္ဂးဂှ်တှ်ေ ဒှ်ညးသိုၚ်မာန်ပ္တိုန်လဝ်ဂၠးတိဇၞော်ဏံကီုရ၊ မိပိုဲတံဇေတ်ဇေတ်ဟီုဂှ်ဗီုလဵုရောတှ်ေ မိယာဲမွဲဟေၚ်ရဒှ်ညးသိုၚ်မာန်ပတိုန်လဝ်ဂၠးတိဇၞော်ဏံကီုရ၊ ယဝ်ရမိယာဲမွဲဟွံမွယ်တှ်ေ အလုံသဗ္ဗနာနာဂွံတိုန်တဴအာမာန်ဂှ်ဟွံလောဲသွာရ၊ မိယာဲမွဲဟီုဂှ် ဒှ်ညးဒုၚ်ဒဒိုက်ဂၠိုၚ်နူကဵုအပါမွဲတုဲ ဒှ်ညးဂံၚ်သၠးဖဵုအတ္တသွက်ကောန်တံ(၂၄)နာဍဳပေၚ်ပေၚ်ကီုရ၊ မိယာဲလ္ၚဵုလ္ၚဵုတံဂှ် အခိၚ်ၜံၚ်ပၟတ်သၠးပဋိသိန္ဓိဂှ်လေဝ် ဒးချိုတ်အာဂှ်နွံတဴဗွဲမဂၠိုၚ်ရ၊ တြုံဗြဴပြးဆာဲဂွံအိန်ထံၚ်တၟိကီုလေဝ် ကောန်ဇာတ်တံဂှ်အာနွံဒၟံၚ်လပါ်မိယာဲဖအိုတ်ရဂၠိုၚ်၊ အပါဟီုဂှ် ၜိုတ်ဆရေၚ်တၠုၚ်ဖဵုဍောတ်ဍောတ်သောဲသောဲညိညကရောံမိယာဲပိုဲတံကီုရ၊ လ္ၚဵုဂှ်ဗြဴဗုၚ်တိတ်ဟီုမံၚ်ဂွံမိၚ်ဂှ်လေဝ် ညးလဵုမွဲဒှ်အပါကောန်ၚာ်တံဂှ်လေဝ်ဟွံတီကေတ်အိုတ်တုဲ ဒၞာဲဏံမိယာဲမွဲပၠန်ရဒးဆက်လွဳပရာကေတ်အာတာလျိုၚ်ဒးမၚ်မွဲအာပၠန်ရ၊ လပါ်မၞိဟ်တြုံဂွံလွဳကောန်တံဂှ်နွံအောန်မံၚ်တုဲ ဗွဲမဂၠိုၚ်တှ်ေမိယာဲမွဲဟေၚ်ရဒှ်ညးလွဳပရာကောန်ဇာတ်တံဂှ်ဂၠိုၚ်ရ၊ ယဝ်ရဟီုကၠးကၠးသောၚ်သောၚ်တှ်ေ အပါမွဲနွံလပါ်မ္ၚးတုဲ မိယာဲမွဲဟေၚ်ရဒှ်ညးနွံလပါ်ပ္ဍဲသွက်ကောန်ဇာတ်တံရ။
ဥပမာ − မိမ ၊ ယာဲအပါ ၊ မိယုအပါယု'''(မိဗျုအပါဗျုလေဝ်ကော်ရ၊)''' မူဟိုတ်ရောမိယာဲမွဲဒးကော်စွံလဝ်ဗွဲမလိက်ကၠာရောဂှ်ဆဵုကေတ်မာန်ရ၊ ညံၚ်ရဴအဝေါၚ်ပၞာန်ကီုလေဝ် ၝောံဒပ်မွဲၝောံဒပ်ၜါလေဝ်ညးကော်စရ၊ ၝောံဒပ်ဏံဂှ်ပ္ဍဲကဵုဂကူသေံတံသုၚ်စောဲဒၟံၚ်စဵုကဵုတ္ၚဲဏံကီုရ၊ '''(ၝောံဒပ်ပၞာန်စၟတ်(၁) ၝောံဒပ်ပၞာန်စၟတ်(၂)ဗွဲတုန်)''' − ညံၚ်ၝောံတဲၝောံဇိုၚ်ပိုဲမၞိဟ်ဏံကီု စၞးဒးကော်ၝောံတဲၝောံဇိုၚ်ဂှ် မူပရောပိုဲတံဟွံကော်ကၟက်တဲဇိုၚ်ရော၊ ယဝ်ပိုဲကော်ကၟက်တဲကၟက်ဇိုၚ်တှ်ေကၠိုဟ်မံၚ်ဏီဟာ၊ ဒၞာဲဏံလေဝ်ၝောံဟီုဂှ်ဒှ်စၞးဗြဴလေဝ်ဟီုစဂွံရ၊ ဣဏံလေဝ်ၝောံဒးနွံမံၚ်ဂတကၠာပၠန်ရ၊ '''(ဟိုတ်ၝောံဒးမံၚ်ဂတးဂှ်လေဝ် ညးလဵုမွဲဂၠာဲဟိုတ်ဖဵုမာန်တှ်ေလဴစကဵုကီုညိအဴ)၊''' ဟွံအိုတ်ဏီပုဟ် ဆက်နွံအာညိညဏီ၊ ညံၚ်ရဴခၟတ်ဂြုန်စၟစၟောန်တံဂှ်လေဝ် မူပပိုဲတံဒးဟီုစၝောံဍေံဂှ်အိုတ်ရော၊ ကၟက်ဍေံဂှ်လေဝ်မွဲတုဲမှဟွံကေၚ်မိၚ်မွဲလှ်ေဏီရ၊ နူပိုဲဍောတ်ဍောတ်ကေၚ်ဍန်ကတုဲ အခိၚ်ဍန်ဂွံကဇၞော်ဇၞော်တှ်ေ ပိုဲကော်စၝောံကယာဲကလေဝ်ဟီုရ၊ ကၟက်ကဂှ်ရဲပိုဲဍန်ကညးမွဲမှဟွံဟီုအိုတ်ရ၊ ကေၚ်မိၚ်ကေၚ်ဟီုၝောံကလၟိုန်ရ။
(အရေဝ်ဗ္တောန်မိယာဲ ဒးနွံကဵုစဳပၞောန်)
နူစအဲညးချူလိက်ဏံဍောတ်ဍောတ်တေံသမ္တီဒးစညိညဂှ်တှ်ေ ပွမဗ္တောန်ကောန်ဟီုဂှ်ဒှ်တာလျိုၚ်မိယာဲမွဲဂၠိုၚ်နူကဵုအပါမွဲတုဲ ပိုဲတံလေဝ်လုက်စုက်ကဵုမိယာဲဂၠိုၚ်နူအပါဏီရ၊ လဆောဝ်တှ်ေ ပိုဲကောန်တြုံတံလေဝ် ဒးဘိုၚ်ဍုန်တိုပ်ပုၚ်သွပ္ဍဲဖဴတေံကရောံမိယာဲတွဵုတွဵုရ၊ ကောန်ဗြဴဂှ်နွံအောန်ဒၟံၚ်တုဲ ပိုဲကောန်တြုံတံဂှ်လေဝ် ဒးဗ္တောန်ကၠုၚ်လဝ်ညံၚ်ရဴကောန်ဗြဴတံတုပ်တုပ်ဖအိုတ်ရ၊ မိယာဲဗ္တောန်လဝ်အရာစဳပၞောန်နာနာဟီုဂှ်တှ်ေ ညံၚ်ရဴတုန်−သုၚ်စောဲဍာ်လေဝ်ဒးနွံကဵုစဳပၞောန်၊ မုအရာသုၚ်စောဲလေဝ်ဒးနွံကဵုစဳပၞောန်ဖအိုတ်ရ၊ ဂွံဒှ်ကၠုၚ်ဒ္ဂေတ်ပွစဳပၞောန်ပ္ဍဲတ္ၚဲဏံဟီုဂှ် ဂွံကၠုၚ်အရေဝ်ဝေတ်ဗ္တောန်နူမိယာဲမွဲရ၊ '''(အခေတ်တ္ၚဲဏံညးဂမၠိုၚ်ဟီုစမံၚ်တွဵုဂှ်တှ်ေ ၝဏံၝဲဏံသအေတ်ကွေံကွေံရ၊ စၞးဒးဟီုသအေတ်ဂှ် ယဝ်ဟီုၝဏံၝဲဏံစဳပၞောန်နွံခိုဟ်ကွေံကွေံတှ်ေ ကလၚ်စဂတာပ်အခေတ်ဗွဲမလောန်ရ)''' ၊ ယဝ်သၠာဲဂွံတှ်ေ စၞးဒးဟီုသအေတ်ဂှ် သၠာဲထောံနွံကဵုစဳပၞောန်တှ်ေဂတာပ်အခေတ်ရ။
ပ္ဍဲအခိၚ်သုၚ်စောဲအှ်ေဆုဒ္ကုတ်ဂှ်လေဝ် ဒးနွံကဵုစဳပၞောန်အိုတ်ညိ၊ မိယာဲအဲညးချူလိက်ဏံကေၚ်ဟီုဒၟံၚ်တွဵုဂှ်တှ်ေ၊ ယဝ်သုၚ်စောဲအှ်ေဆုဒ္ကုတ်ဟွံလေပ်တှ်ေဒှ်ဍိက်အှ်ေဆုဒ္ကုတ်တံဂှ်ရ၊ ယဝ်သုၚ်စောဲဍာ်ဟွံလေပ်တှ်ေဒှ်တဴဍိက်ဍာ်မာန်ရ၊ ညံၚ်ရဴသုၚ်စောဲမသြန်ဂှ်ကီု ယဝ်သုၚ်စောဲစကာဟွံလုပ်တှ်ေ ဒှ်တဴဍိက်သြန်လောဲလောဲကီုရ၊ '''(အဲသောၚ်လဴကဠးထောံညိညကၠာ ဖေက်ညးတၞဟ်ကၠိုဟ်စိုတ်ဗၠေတ်အာညးမွဲမွဲဗီု)၊''' ယဝ်ပိုဲသုၚ်စောဲအှ်ေဟွံလေပ်တှ်ေ အခိၚ်ဍုန်ပုၚ်သွထေက်ကြိုက်ကဵုဒးသုၚ်စောဲအှ်ေဂှ် ပိုဲတံဟွံမွဲကဵုစဳပၞောန်တုဲ စုတ်စံၚ်ထောံအှ်ေဂၠိုၚ်ဂၠိုၚ်
ကဵုတၞုၚ်တုဲ ၜိုန်ရပုၚ်သွစိန်ဝုန် စံၚ်ကစံၚ်မပၞဟ်မဒူရေန်တံတုဲဒှ်အာကီုလေဝ် အှ်ေဂှ်တူသှ်ေဒၟံၚ်လ္တူဖဴဂှ်ဏီဖိုဟ်ရ၊ ဒှ်တဴသာဲဏံဏောၚ်တှ်ေ အှ်ေပိုဲဂၠာဲဂိုၚ်စွံလဝ်သွက်မွဲဗြဲဂှ်အိုတ်ပြဟ်အာတုဲ ပိုဲဒးထပ်ဂၠာဲအှ်ေပၠန်ရ၊ လဆောဝ်တှ်ေဒးရာန်ကေတ်ချးတုဲမသြန်ဒးအိုတ်အာပၠန်ရဟွံသေၚ်ဟာ၊ ဟီုစိုပ်အာဖဵုဏံတုဲ ကူစိုပ်ဂွံအာမိယာဲဆာန်မွဲကွေံကွေံရ။
ပ္ဍဲအရာသုၚ်စောဲဍာ်ဂှ်လေဝ် ယဝ်ပိုဲကၟံက်စဝ်ကၟံက်ဆာဲဟွံချိၚ်ဆမ္ဂးတှ်ေ ဍာ်ဂှ်အိုတ်ပြဟ်အာတုဲ အခိၚ်ဒးအိုတ်ဒးအာကၟံက်ကေတ်ဍာ်ပၠန်ရ၊ ညံၚ်ရဴဍာ်သုၚ်ပ္ဍဲနုၚ်တံဂှ်ကီု ယဝ်ပိုဲကၟံက်ကေတ်နၚ်မွဲဗြံက်ပေၚ်ပေၚ်တုဲ ပိုဲတံသုၚ်ထောံဘာ်ဗြံက်မ္ဂး သှ်ေမံၚ်ဘာ်ဗြံက်ဂှ်ပိုဲကလေၚ်စဝ်စုတ်ပ္ဍဲဍာ်နုၚ်ဂှ်ဟွံဂွံတုဲ ဒးကိုဟ်ဆာဲထောံရ၊ ဟိုတ်သာ်ဂှ်တှ်ေ ဍာ်ပ္ဍဲနုၚ်ဂှ်အိုတ်ပြဟ်အာတုဲ ပိုဲဒးကလေၚ်အာတုက်ကေတ်ဍာ်သုၚ်ပၠန်ရ၊ ဆဂး ဍာ်ဂှ်ၜိုန်ရပိုဲတံဟွံဒးရာန်ကေတ်နကဵုသြန်ကီုလေဝ် အခိၚ်ပိုဲအိုတ်အာတုဲ ဒှ်ဍိက်ဍာ်ဒးအာဂၠာဲတုက်ကေတ်ဍာ်ပၠန်ရဟွံသေၚ်ဟာ၊ သုၚ်စောဲဍာ်လေဝ်ဒးနွံကဵုစဳပၞောန်တုဲ ၜိုတ်ပိုဲသုၚ်အိုတ်ဂှ် တီတုဲကၟံက်ကေတ်ၜိုတ်ထေက်ကြိုက်တုဲသုၚ်ညိ၊ ယဝ်ရပိုဲသုၚ်ဟွံဖဲဏောၚ်တှ်ေ ကလေၚ်ထပ်ကၟံက်ကေတ်ပၠန်ညိမုဟွံဒှ်ပုဟ်၊ ဣဏံအရေဝ်ဗ္တောန်မိယာဲအဲညးချူလိက်ဏံ စဵုကဵုတ္ၚဲဏံလေဝ်စကာသုၚ်စောဲတုဲဒှ်ဖဵုဗွဲမလောန်ဂတာပ်အခေတ်ကွေံရ၊ ၜိုတ်ဆသုၚ်ဍာ်ဓဝ်ဂှ် ပြံၚ်သၠာဲဗဂဵုလဟဵုအာကဵုအခေတ်ကာလဒေသတုဲ တၞုၚ်ဗၠိုၚ်ဖဵုဍေံတိတ်ဂၠိုၚ်အာသက်ပ္တောံၜိုတ်ဟွံမာန်ရ။
ပ္ဍဲအရာသုၚ်စောဲစကာသြန်လေဝ်ဒးနွံကဵုစဳပၞောန်ကွေံကွေံရ၊ ဒၞာဲဟွံဒှ်ဖဵုခိုဟ် ဖဵုဍေံနွံအောန်တုဲ သုၚ်စောဲရာန်အာပေၚ်ပြးဗက်အရီုစိုတ်ကီု ပတုပ်ဗက်ညးတၞဟ်တုဲရာန်ဗက်ပြိုၚ်မံၚ်ညးသ္ကံမ္ဂးတှ်ေ မသြန်ပိုဲဂှ်အိုတ်အာသၟးသၟးဖဵုအောန်တဴတုဲ ညးဒးဒှ်ဒဒိုက်ပၠန်ဂှ် ခန္ဓကာယပိုဲဏံရဒးဆက်ကၠောန်အာကမၠောန်ဂၠိုၚ်ဂၠိုၚ်ပၠန်ရ၊ ညးလ္ၚဵုတံဂှ်လေဝ် မသြန်ဂှ်စံၚ်ထောံဒှ်အာသၟးသၟးဟွံကတုဲ စသုၚ်ဗ္ၜုဓလူစၞဟွံမွယ်ကဵုပရေၚ်ထက်ယုက်နာနာသာ်ဗီုအခေတ်တ္ၚဲဏံအိုတ်တုဲ ဗွဲလက္ကရဴအိုတ်ဂှ်တှ်ေ သြန်လေဝ်အိုတ် ဟိုတ်ဂှ်ဍေံကဵုဖဵုတုဲ ပရေၚ်ထက်ယုက်ဟွံခိုဟ်က္တဵုဒှ်ယဲဝေဒနာအိုတ်တုဲ ခန္ဓကာယဏံပၠန်ရဒှ်ဒဒိုက်ဒးအာဂၠာဲသြန်ပၠန်ရ၊ သုၚ်စောဲသြန်ဟွံလေပ်တုဲဒှ်ဍိက်သြန်ညးကော်ခဴစရ၊ ပိုဲတံသုၚ်စောဲစကာအရာလဵုလေဝ် ယဝ်ဟွံမွယ်ကဵုစဳပၞောန်မ္ဂးတှ်ေ ပိုဲဒးဒှ်ဍိက်အရာတေံမာန်ဏောၚ်၊ ဟိုတ်ဒှ်သာ်ဂှ်တုဲ ပရေၚ်စဳပၞောန်ဟီုမ္ဂးဂှ်တှ်ေ တ္ၚဲဏံအခေတ်ပြိုၚ်ပ္ကာန်ဂၠိုၚ်တိုန်တုဲ ထေက်ကဵုဒးသုၚ်စောဲဂတာပ်အခေတ်ဗွဲမလောန်ရ၊ သီုဖအိုတ်ဏံဂှ် ဂွံကၠုၚ်နူမိယာဲမွဲဂၠိုၚ်နူကဵုအပါဏီရယဝ်ဒးသၟာန်အဲညးချူလိက်ဏံတှ်ေ။
(မုကၠောန်ကၠောန် ဒးကၠောန်ၜိုတ်ထေက်ကြိုက်တွဵုဏး)
ကောန်တံမုကၠောန်ကၠောန် ဒးကၠောန်ၜိုတ်ထေက်ကြိုက်ဂှ်တှ်ေ၊ ညံၚ်ရဴခွါတ်သတ်ဗြဴပတ်ဍာ်တှ်ဂှ်ကီု ဒးသုၚ်စောဲဒြဟတ်ၜိုက်ထေက်ကြိုက်တုဲ ခၟိက်သတ်ဗြဴမတိတ်ဒတုံစှ်ေတံဂှ်လေဝ် နွံဒှ်ကြဳကြဳဟွံတီုအာတုဲ အခိၚ်ပတ်ပ္တိတ်ဍာ်တှ်ပၠန်လေဝ်ဒှ်ဖဵုဗွဲမလောန်ရ၊ ကောန်ဗြဴခွါတ်သတ်ဗြဴမိယာဲပေၚ်စိုတ်နူကဵုကောန်တြုံတံဏီရ၊ ကောန်တြုံခွါတ်သတ်ဗြဴနွံကဵုဒြဟတ်ထတ်ထတ်တုဲ ခၟိက်သတ်ဗြဴတိက်ကၠုၚ်ကလောံတီုတီုအိုတ်ရ၊ အခိၚ်ပတ်ပ္တိတ်ဍာ်တှ်ဂှ်တှ်ေ ဂွံကၠုၚ်ဍာ်တှ်သတ်ဗြဴအောန်ကွေံကွေံရ၊ မိယာဲဆဵုကေတ်သာ်ဏံတုဲ မိယာဲမွဲဟီုဝေတ်ဒၠောံဗ္တောန်လဴကေတ်သိုက်သိုက်ရ၊ ယဝ်ခၟိက်သတ်ဗြဴတီုအာတှ်ေ ဂွံဍာ်တှ်အောန်အာတုဲ ဍာ်တှ်မသှ်ေဒၟံၚ်တံဂှ်လေဝ် နွံဒၟံၚ်ပ္ဍဲခၟိက်သတ်ဗြဴတီုတီုတံဂှ်ဖ္အိုတ်ရ၊ ညံၚ်ရဴကောန်ဗြဴခွါတ်သတ်ဗြဴကီု ဒးခွါတ်ၜိုတ်ထေက်ကြိုက်ဍိုန်ၜတ်သာသာတုဲ ဂွံကၠုၚ်ခၟိက်သတ်ဗြဴကြဳကြဳ ပတ်ဍာ်တှ်လေဝ်ဂွံကၠုၚ်ဍာ်တှ်ဗွဲမဂၠိုၚ်ရ၊ နဲကဲနာနာသာ်လေဝ်မိယာဲမွဲပၠန်ရဗ္တောန်ဟီုလဴလဝ်တုဲ၊ မူပိုဲတံကၠောန်ကၠောန် ၜိုတ်ထေက်ကြိုက်ဂှ်ကၠောန်ပ္တိတ်ဒြဟတ်အိုတ်ညိကောန်တံ ဗီုဏံဗွဲတုန်။
အခိၚ်မိယာဲစကာပိုဲကောန်တြုံတံခွါတ်သွတ်ဗြဴဂှ်တှ်ေ ပိုဲတံဟရေက်ဂွံဝေၚ်ကဵုသ္ကံရဲမၚ်ဒၟံၚ်တုဲ ခွါတ်ကေတ်ထတ်ထတ်ဂွံတုဲပြဟ်တုဲ ခၟိက်သတ်ဗြဴဗီုပိုဲဆဵုမံၚ်ဂှ်ရကမၠောန်ကောန်တြုံ၊ ကောန်ဗြဴခွါတ်သတ်ဗြဴဒြဟတ်ဟွံမွယ်ဗီုကောန်တြုံတုဲ ခွါတ်ကေတ်သိုက်သိုက်ၜိုတ်ထေက်ကြိုက်တုဲ ဂွံကၠုၚ်ခၟိက်သတ်ဗြဴပေၚ်စိုတ်မိယာဲမွဲရ၊ အခေတ်တ္ၚဲဏံၜိုန်ရသုၚ်စောဲဗီုကၠာတေံနွံအောန်ကၠုၚ်ကီုလေဝ် အရေဝ်ဗ္တောန်မိယာဲဗီုဗီုဏံလေဝ် ကဏ္ဍဒၞာဲလ္ၚဵုတံဂှ်လေဝ် သုၚ်စောဲနှဴအာညံၚ်ဂွံဂတာပ်အခေတ်တုဲ ဒှ်ကၠုၚ်ဖဵုသွက်ဘဝဇကု သွက်ဂကောံအိန်ထံၚ်ဇကု သွက်ဗွဳဗွိုၚ်ကောဒေံဇကုခိုဟ်ကွေံကွေံရ။
ပွမဒုၚ်ကျဂှ် ဒှ်မၞိဟ်အစောံစရာဲဟွံမွယ်ဟွံသေၚ်၊ ဇၟာပ်ဇၟာပ်မၞိဟ်ဂှ်ဒးစိုတ်ဒၟံၚ်အရာညိၚ်ဝတ်ဖ္အိုတ်ရ၊ ဟိုတ်နူကဵုဟွံဂွံက္တဵုဒှ်ပြသၞာညးသ္ကံမာန်၊
မိယာဲမွဲဝေတ်ဒၠောံဗ္တောန်လဝ် ဒးမံၚ်အကြာညးဂမၠိုၚ်တှ်ေ ဗွဲမဍိုန်ၜိုတ်နွံကဵုယေန်သၞာၚ်ဂှ်မံၚ်ပံၚ်ဖက်အာကဵုညးတၞဟ်ညိ၊ မိယာဲဗ္ကန်လဝ်ပၠန်ဂှ်တှ်ေ ပွမဒှ်သၞတုဲဇကုဒုၚ်ကျဂှ် ဒှ်မၞိဟ်အစောံစရာဲဟွံမွယ်ဟွံသေၚ်ပုဟ်ဏး၊ မိက်သ္ဂောံကဵုပရေၚ်ပရောပြသၞာတံဂှ်ဂွံသ္ၚိတ်အောန်အိုတ်အာမာန်ရ၊ မၞိဟ်ဒုၚ်ကျကၠာဂှ်လေဝ် ထေက်ကဵုဒှ်မၞိဟ်မာန်စိုတ်ဇကုတုဲ နွံကဵုအစောံစရာဲမၞိဟ်တြုံမွဲပေၚ်ပေၚ်ရ၊ ပေဲါဗ္တိုက်စိုတ်ဗီုဏံဂှ် မၞိဟ်ဂွံမာန်အံၚ်ဇၞးကေတ်ဍေံဂှ်နွံအောန်ကွေံကွေံရ၊ ယဝ်ရဒှ်အခေတ်တ္ၚဲဏံမ္ဂးတှ်ေ ဒးဗဂဵုလဟဵုညံၚ်ဂွံဂတာပ်အခေတ်တုဲ ယဝ်ရပိုဲဏံလေဝ်ဟွံဗၠေတ်ကီု ယဝ်ဖဵုဍေံနွံအောန်မံၚ်ရတှ်ေ ဒုၚ်ကျထောံလေဝ်မုဟွံဒှ်ပုဟ်၊ ဓဝ်ဍာံဟီုဂှ်ပိုဲဏံတီမံၚ်ရတှ်ေတုဲရ၊ ယဝ်ရဖဵုဍေံဂၠိုၚ်ဇၞော်ကဵုဒြဟတ်ဏောၚ်တှ်ေ ဟိုတ်သာ်လဵုလေဝ်ဒုၚ်ကျဟွံမာန်တုဲ ညံၚ်ဂွံစှ်ေကဵုဗဗွဲဓဝ်ဍာံ ညံၚ်ဟွံမွယ်ကဵုဓဝ်မ္ၚိုဟ်ကြံၚ်လ္တူညးသ္ကံမာန်ဂှ် ဒးဖန်ကၠောန်အာရ။
မိယာဲဗ္တောန်လဝ်နွံမွဲပၠန်ဂှ်တှ်ေ ပ္ဍဲအခိၚ်စပုၚ်မ္ဂးတှ်ေ ဒးကဵုပုၚ်ကဵုဗ္ဂဲတံကၠာတုဲစပုၚ်ညိ၊ အခိၚ်တေံဇကုဍောတ်သွတ်မံၚ်တုဲ အခိၚ်စပုၚ်ဂ္ဇံခုၚ်ရဏောၚ်တှ်ေ မိယာဲစကာအဲကဵုပုၚ်ဗ္ဂဲတွဵုရ၊ လဆောဝ်တှ်ေသီုထေဲတဴရ၊ လညာတ်ကောန်ၚာ်မွဲဂှ်တှ်ေ ဗ္ဂဲဂှ်မၞိဟ်လေဝ်ဟွံသေၚ်ရတှ်ေ ပိုဲစတုဲတှ်ေကဵုဗ္ဂဲစတှ်ေတုဲရဒှ် ကောန်ၚာ်မွဲဍောတ်ကၠိုဟ်ကေတ်စိုတ်သာ်ဏံရ၊ အခိၚ်မိယာဲမွဲဟွံမွယ်ချိုတ်အာတုဲ တ္ၚဲဏံဇကုဇၞော်တိုန်ဒှ်ကၠုၚ်ကဵုဂကောံအိန်ထံၚ်ဇကုကဵုဇကုကေတ်ကေတ်တုဲ သွဟ်ဍေံမုပဒးကဵုပုၚ်ဗ္ဂဲကၠာနူမၞိဟ်ဏီရော တ္ၚဲဏံတီကၠိုဟ်ကၠးကၠုၚ်ညံၚ်ကွက်ဒ္ကုဲလဝ်သၟိၚ်ဂိတုဂတမုက်ရ။
ယဝ်ရရံၚ်အာကဵုဟိုတ်ဖဵုဏောၚ်တှ်ေ ယဝ်သ္ၚိပိုဲလွဳလဝ်ကောန်ဗ္ဂဲမ္ဂးတှ်ေ အခိၚ်စပုၚ်ယဝ်ပိုဲဟွံကဵုကောန်ဗ္ဂဲယာဲဗ္ဂဲတံစထောံပုၚ်ကၠာမ္ဂးတှ်ေ ဗ္ဂဲတံဂှ်ဟွံမံၚ်ညိၚ်ညိၚ်တုဲ ဂေတ်အာဂေတ်ကၠုၚ်အကြာသၟဝ်ခုၚ်စပုၚ်တုဲ လရိုဟ်တဴညဴညဴသီုကဵုအရီုစပုၚ်အလုံမွဲခုၚ်ဂှ် ဖန်ဗဒှ်ကဵုဟွံမွယ်ကဵုသမာဓိစပုၚ်ကီု ၜါရိုဟ်ကောန်ဗ္ဂဲတံဏံလေဝ်အပါပိုဲညးဟီုဗျိဒေါန်ဂွံမိၚ်မံၚ်တွဵုရ၊ လဆောဝ်တှ်ေ အဃောရပ်လဝ်ကလောံကစုတ်ပါၚ်ဂှ်ရ ဗ္ဂဲဂှ်ပၠံၚ်ရပ်စထောံဏာလောဲလောဲဂတမုက်ရ၊ သိုၚ်ဗဒှ်ကဵုအပါပိုဲဒှ်ဒေါသတုဲ နကဵုဂတာတဲဝဲဏာမွဲအသိၚ် ပုၚ်သွပေၚ်ပြးမွဲခုၚ်လေဝ်
ကေၚ်ဆဵုလဝ်နမတ်ရ၊ ပိုဲကောန်ၚာ်တံလေဝ် အဃောစပုၚ်ဂှ် ဟွံမွယ်ကဵုအရီုစိုတ်ခိုဟ်ခိုဟ်တုဲ ၜိုန်ရမိမကောဒေံစပုၚ်မွဲဝိုၚ်ဒှ်အခိၚ်တက်ကျာနကဵုယေန်သၞာၚ်ဂှ် အရီုပြံၚ်သၠာဲအာဒၟာနူကဵုဗ္ဂဲတံဂှ်ကီုရ၊ ယဝ်ရပိုဲကဵုထောံပုၚ်ဗ္ဂဲကၠာဏောၚ်တှ်ေ ဗ္ဂဲတံစဖဲတုဲ ကောန်ဗ္ဂဲတံဂှ်လေဝ် ဟွံယှုက်ထုဲအကြာသၟဝ်ခုၚ်တုဲ အရီုမိမတံတက်ကျာပ္ဍဲဝိုၚ်စပုၚ်ဂှ်လေဝ် နွံကဵုယေန်သၞာၚ် ၚိတ်ဖျေံအမာဲပုၚ်သွပၠန်လေဝ် တီရှ်သၞာခိုဟ်ကွေံကွေံရ၊ ပိုဲကောန်ၚာ်ဂ္ဇံထွာဲဒၟံၚ်ပ္ဍဲခုၚ်စပုၚ်ဂှ်လေဝ် နွံကဵုဗွဲမမိပ်စိုတ်ဂွံဆဵုမုက်မတ်မိမၜါတံတက်ကျာနွံကဵုအရီုပွမအီဂြိုၚ်ညးသ္ကံကီုရ၊ အခိၚ်
ပိုဲဍောတ်တေံဂှ်တှ်ေ ပ္ဍဲဝိုၚ်စပုၚ်ဂှ် ပိုဲကောန်ၚာ်တံအခေါၚ်တက်ကျာဟွံမွယ်ရ၊ '''ဆဂးမၞိဟ်ဇၞော်ဇၞော်တံတက်ကျာဂွံမံၚ်ဖိုဟ် ဟး ဟး ဟး ၊ အေလေဝ် ဇကုကောန်ၚာ်တှ်ေ ဟိုတ်ဖဵုအောန်တုဲညးဟွံကဵုအခေါၚ်တက်ကျာသာ်ဏံတွဵုလေဝ်၊''' ၜိုတ်ဆဒးကဵုပုၚ်ကဵုဗ္ဂဲကၠာဂှ်လေဝ်နွံကဵုဟိုတ်ဖဵုနဲကဲသိပ္ပံဂတာပ်အခေတ်စဵုကဵုတ္ၚဲဏံဏီရ၊ ယဝ်ရဟီုလညာတ်ညးတြေံတြဟ်တေံသုၚ်စောဲဟွံဂွံတှ်ေဗၠေတ်အာရ၊ ညံၚ်ဂွံဂတာပ်အခေတ်ဂှ် ပိုဲတံပံၚ်နှဴညံၚ်ဂွံနွံကဵုဟိုတ်ဖဵုတုဲ ဗဂဵုဟလဵုအာအရေဝ်ဗ္တောန်မိယာဲသိုက်သိုက်အိုတ်ညိ။
ယဝ်ပိုဲဂိုၚ်စွံစညးမွဲတှ်ေဒှ်အာအိက်ဖအိုတ်ရ၊ ယဝ်ရပိုဲပါ်ပရအ်ကဵုညးတၞဟ်စကီုတှ်ေ နွံဒၟံၚ်ပ္ဍဲစိုတ်ညးတၞဟ်လၟိုန်အခိၚ်အခါရ၊
သတ်တိရစ္ဆာန်တံဂှ်လေဝ် ဒှ်တဴသ္ကံရဲဆာန်ပိုဲဖအိုတ်ကီုရ၊ ရဲအာတ်စဟွံမွယ်ကဵုသ္ၚိဒၞာဲတိက်တံဂှ်လေဝ် ဒှ်တဴသ္ကံရဲမိတ်သဟာပိုဲတံဖအိုတ်ရ၊ ၜိုတ်ဒြဟတ်ပိုဲနွံ ၜိုတ်သြန်ပိုဲနွံ ၜိုတ်စၞစအဟာရပိုဲနွံ ၜိုတ်မအရေဝ်ပိုဲနွံရီုဗၚ်ဍေံတံဂွံဂှ်တှ်ေ ထေက်ကဵုဒးကဵုရီုဗၚ်တွဵုညိဏး၊ သာ်ဏံလေဝ်မိယာဲမွဲဗ္တောန်လဝ်ကီုရ၊ စၞစဟီုမ္ဂးဂှ်လေဝ် ယဝ်ပိုဲနွံဂၠိုၚ်အာယျတုဲ စသုၚ်လေဝ်ဟွံအိုတ်ရဏောၚ်တှ်ေ ပိုဲတံထေက်ကဵုဒးပါ်ပရအ်ညးတၞဟ်တံဂှ်ကီုညိ၊ ယဝ်ပိုဲစွံလဝ်စညးမွဲတှ်ေ ဒှ်အာအိက်ပသပသဖအိုတ်ကီုရ၊ ယဝ်ပိုဲတံစသုၚ်လေဝ်ဟွံအိုတ်ဏောၚ်တှ်ေအုဲအာအိုတ်ကီုရ၊ ယဝ်ပိုဲပါ်ပရအ်ကဵုညးတၞဟ်စကီုတှ်ေ ၚုဟ်မးစၞစပိုဲဏံဂှ်နွံဒၟံၚ်ပ္ဍဲစိုတ်ညးတၞဟ်လၟိုန်အခိၚ်အခါမာန်ရဟွံသေၚ်ဟာ၊ ယဝ်ရအခေတ်တ္ၚဲဏံတှ်ေ ပါ်ပရအ်ကဵုညးတၞဟ်စဂှ်လ္ပတက်ကျာဏီ ဒှ်မံၚ်သြန်ဖအိုတ်ဏောၚ်ဂး ၊ ၜိုတ်ထေက်ကြိုက်ပိုဲပါ်ပရအ်ဂွံဂှ်တှ်ေ ဒှ်ဖဵုသွက်ပိုဲဏံသက်သက်ကီုရ။
မိယာဲဗ္ကန်လဝ်ကောဇၞော်ၝဲဇၞော်တံဒးဆာန်ဒေံတံဏောၚ်ဏး၊ ဒေံကေတ်မာန်လ္တူကောၝဲတံဂွံကီုရ၊ ဆဂး ၝဲတံကောတံကေတ်သ္ပမာန်လ္တူဒေံတံဟွံဂွံပုဟ်၊ ဒေံလီဠာန်ဂွံ ဆဂး ကောတံၝဲတံလီဠာန်ဒေံဟွံဂွံပုဟ် သာ်ဏံလေဝ်မိယာဲဗ္ကန်လဝ်ရ၊ ယဝ်ရရံၚ်အာကဵုအခေတ်တ္ၚဲဏံတုဲတှ်ေ ပိုဲတံဒးရံၚ်ကဵုဟိုတ်ဖဵုနွံဂၠိုၚ်တုဲ သုၚ်စောဲစကာအာညံၚ်ဂွံစှ်ေကဵုဗဗွဲဓဝ်အခေတ်အိုတ်ညိ၊ ဆဏံသၟးဟွံကဏီတုဲ ပ္ဍဲအခိၚ်ဘာကၟာတ်အခိၚ်သၠးတှ်ေ ကောန်ၚာ်တံထေက်ကဵုဒးကၠောန်ကမၠောန်ပ္ဍဲသ္ၚိအိုတ်ညိ၊ မပ္တံကဵုသ္အးဇ္ၚးသ္ၚိ ၊ ကြာတ်ကြဴပ္ၚာၚ်စပုၚ်ဂှ်ကီု ၊ အခိၚ်မိမၜါစဴကၠုၚ်နူကၠအ်ဝါတေံဂှ်တှ်ေ ပိုဲကောန်တံဒးလိုန်ပတ်ညံၚ်ညးတံဂွံဍောၚ်ကွိုၚ်ပြေမာန်ဂှ်လေဝ် ဒးကၠောန်အာမာန်ရ၊ ဒးလိုန်ပတ်ကဵုမိမၜါဂှ် အဲညးချူလိက်ဏံလေဝ်ဒးလိုန်ပတ်ဒၟံၚ်တွဵုရ ဟး ဟး ဟး ၊ လဆောဝ်လဆောဝ်တှ်ေသီုကဵုထေဲလေဝ် အတေံရဲတံမၚ်မံၚ်ဂွံဝေၚ်မခ္ဍံကျာ ဂွံဝေၚ်မဝေၚ်တုဲ ပတ်လိုန်အာနကဵုဒေါသတုဲ ခြာဟွံလအ်မိယာဲကီုအပါကီုဟွံပေၚ်စိုတ်တုဲ နကဵုအသိၚ်ဟွံပေၚ်စိုတ်ညးတံဟီုဏာ အာအာဂွံရလ္ပလိုန်ရ၊ စကာၝတံတှ်ေဗီုဏံတွဵု ဗီုသာ်ဏံလေဝ်ဇၟာပ်ညးအဲကေၚ်လောန်ၜက်ကၠုၚ်သီုညးဖအိုတ်ကီုရဟွံသေၚ်ဟာ၊ တ္ၚဲဏံၜိုန်ရပိုဲကောန်တံမိက်ဂွံလွဳပရာလိုန်ပတ်ညးတံကီုလေဝ်အခိၚ်အိုတ်အာယျ၊ ဟိုတ်သာ်ဏံလေဝ် ပိုဲကောန်တံဒှ်ကၠုၚ်ဒ္ဂေတ်ပွနွံကဵုစဳပၞောန်စဵုကဵုအခိၚ်ဇၞော်တိုန်တ္ၚဲဏံဂှ်လေဝ် ခက်ဗါန်သှ်ေနွံဒၟံၚ်ပ္ဍဲဖျုန်စၞာံဇုတ်ဆီပိုဲကောန်တံဏီရ၊ ကူစိုပ်ဂွံအာသာ်ဏံတုဲ ဗှ်သၞာမိမၜါကွေံကွေံရ၊ တ္ၚဲဏံလေဝ်ညးတံဟွံမွယ်ရတှ်ေ လၟေၚ်သဘာဝဘဝလေဝ်ပိုဲတံဒးဆက်ကွာ်အာဗွဲမဍာံစၟတ်မွဲတုဲ ညံၚ်ပိုဲကောန်တံဂွံဒှ်မၞိဟ်ခိုဟ်မွဲမာန်ဂှ် ဒှ်အဓိကသွက်ဂွံကဵုမိမၜါတံ ဂွံချိုတ်အာနကဵုဓဝိၚ်ၜိုဟ်ၜိုဟ်ဂှ်အိုတ်ညိ။
မိယာဲဗ္တောန်လဝ်ဂါထာစဵုဒၞာကမၠတ်(မၠတ်)
မိယာဲမွဲစကာကဵုပိုဲကောန်တံဒးစိုတ်ဆာန်ကၠောန်ကမၠောန်အိုတ်ညိ၊ ကမၠောန်မွဲဟေၚ်ကဵုသွဟ်သွက်ဘဝပိုဲတံနာနာမာန်တုဲ ကုသဵုခိုဟ်ပရေံဂှ်လေဝ်နွံဒၟံၚ်ပ္ဍဲကဵုကမၠောန်ဂှ်ဖအိုတ်ရ၊ မိယာဲဗ္တောန်လဝ် အခိၚ်သၠးမ္ဂးဂှ်တှ်ေ ဒးသုၚ်စောဲအခိၚ်ညံၚ်သ္ဂောံနွံကဵုၚုဟ်မးတွဵုညိ၊ အရာဟၟဲကဵုၚုဟ်မးတံဂှ်လ္ပဆက်အာဂၠာဲကၠောန်အိုတ်ညိ၊ အခိၚ်ဟီုဂှ်ၚုဟ်မးပ္တောံၜိုတ်ဟွံမာန်ပုဟ်၊ မိယာဲအဲညးချူလိက်ဏံဒှ်သၟာကၠအ်ဝါဗ္ၚတှ်ေ အခိၚ်ညးတံတဵုလွဵသၞေဝ်ကေဝ်နာနာတှ်ေ ညးလေဝ်စကာကဵုတဵုဗက်အာဗီုညးတံကီုတွဵုရ၊ မိယာဲဗ္တောန်တဵုလွဳလဝ်သၟးဟွံကတုဲ သီုဗ္တောန်ကဵုလဝ်ဂါထာသွက်သ္ဂောံမၚ်မွဲကမၠတ်တံဂှ်ဏီရ၊ ကောန်ဂကူတံဒှ်သံသယယျသေၚ်ဟာ ဂါထာမၚ်ကမၠတ်နွံမံၚ်ဟာ '''ဟး ဟး ဟး''' ၊ မိယာဲအဲညးချူလိက်ဏံဂါထာနွံကွေံကွေံရ၊ စဵုကဵုတ္ၚဲဏံလေဝ် အဲသုၚ်စောဲစကာဒၟံၚ်တုဲ ဒှ်ဖဵုနွံကဵုၚုဟ်မးဂတာပ်အခေတ်ကွေံကွေံရ၊ ဂါထာမိယာဲဗ္တောန်ကဵုလဝ်ဂှ်တှ်ေ '''(ယဝ်ဂစေံတံစမ္ဂးတှ်ေသ္ပကုသဵုညိ၊ ယဝ်မၞိဟ်ကၠတ်စဏာမ္ဂးတှ်ေ ကဵုဒါန်စၞစဂွံဗပေၚ်ဗုၚ်ဂၞဴညးတံအိုတ်ညိ)''' ဣဏံရဂါထာမိယာဲဗ္တောန်လဝ်၊ ယဝ်ရဒးသုၚ်စောဲပ္ဍဲအခေတ်တ္ၚဲဏံမ္ဂးတှ်ေ ညံၚ်ကဵုဟွံဂတာပ်အခေတ်စကွေံရကောန်ဂကူတံ ဒှ်သံသယအိုတ်ရဟွံသေၚ်ဟာ၊ ပိုဲတံဒးရံၚ်ကဵုအခေတ်ဟိုတ်ဖဵုဂၠိုၚ်ဂၠိုၚ်တုဲ သုၚ်စောဲအာအိုတ်ညိတှ်ေ ဂတာပ်အခေတ်ကွေံကွေံရ၊ ညးဗ္တောန်လဝ်မွဲအခိၚ်တေံတုဲသုၚ်စောဲအခိၚ်တေံဂွံမံၚ်ရ၊ အခေတ်တ္ၚဲဏံလေဝ် ပိုဲတံဖက်နှဴဟိုတ်ဖဵုကဵုဂၠိုၚ်ဂၠိုၚ်တုဲသုၚ်စောဲအိုတ်ညိ။
ဂစေံတံစမ္ဂးတှ်ေ သ္ပဏာကုသဵုစိုတ်ဂှ်ဗ္စာရဏာသာ်ဏံညိ၊ မၞိဟ်ကၠတ်စဏာမ္ဂးတှ်ေ ကဵုဒါန်ဗပေၚ်ဗုၚ်ဂၞဴသွက်ညးတံဂှ်ဗ္စာရဏာသာ်ဏံအိုတ်ညိ၊ ယဝ်ရပိုဲကောန်ဂကူတံဗ္စာရဏာဂွံဟိုတ်ဖဵုသာ်ဏံတုဲ သၞေဝ်ကေဝ်သတ်ဆုသတ်ဒုန်ပိုဲကၠေံအာဂှ် ဟွံဟီုစိုပ်ဏာကဵုကမၠတ်ကၠတ်ထောံအိုတ်တးရ၊ စိုတ်ဏံဂှ်လေဝ်ဟွံဒှ်သရတုဲ ကၠေၚ်က္ဍဟ်ပိုဲဏံဂှ်လေဝ်ဟွံထုဲကၠိအာမာန်ရ၊ ယဝ်ဂစေံစထောံပၠန်လေဝ် ကဵုဂစေံတံစတုဲ ပိုဲတံလ္ပပန်ပှော်လ္ပဂစိုတ်ဂစေံတံဂှ်အိုတ်ညိ၊ ဣဏံဂှ်လေဝ်ဒှ်နဲကဲဗုဒ္ဓဘာသာမွဲဇေတ်ဇေတ်ရ၊ ညံၚ်ဂွံဂတာပ်အခေတ်ဂှ်ပံၚ်နှဴသုၚ်စောဲအာညိ၊ ယဝ်ရဟီုစိုပ်အာအခေတ်တ္ၚဲဏံမ္ဂးတှ်ေ ဗီုနူကဵုကၠာတေံတံဂှ်တၞဟ်ခြာအာတုဲ ညံၚ်ဍေံဂွံကိတ်ညဳမာန်ဂှ်ပိုဲတံဖန်ကၠောန်အာညိဂှ်ဖဵုသွက်ပိုဲဏံသက်သက်ရ၊ ယဝ်ဆဵုဂစေံတံကၠုၚ်စတုဲ ပိုဲတံပန်ပှော်ဂစိုတ်ထောံမ္ဂး ဖဵုဍေံသွက်ပိုဲအောန်ကွေံကွေံရ၊ ဂစေံတံဂှ်လေဝ်နွံကဵုခပေဲါဒၞာဲ နွံကဵုခၟာဲကောန်တံအိုတ်တုဲ ယွံပိုဲဂစိုတ်ထောံမိယာဲဍေံတုဲတှ်ေ သဘာဝဂြိုပ်ဂၞိၚ်ဟီုဂှ်လီုကၠုၚ်သိုက်သိုက်မာန်ရ၊ ယဝ်ပိုဲတံတီဆဵုကေတ်ကၠးကၠးနကဵုမတ်ၜါမ္ဂးတှ်ေ စိုတ်ပိုဲဏံလေဝ်ဟွံမွယ်ကဵုတသိုက်ကီုရ၊ ကမၠတ်တံဂှ်ပၠန်လေဝ်ဗီုဏံကီုရ၊ ယဝ်ရဍေံကၠတ်ၜိုတ်ဆစတှ်ေ ဒးကဵုဏာဍေံဂှ်ညိ၊ ဆဂး ပိုဲဒးဟီုလဴကဵုဍေံဒးနွံကဵုဟိုတ်ဖဵုညံၚ်ဂွံမာန်စိုတ်ကမၠတ်ဂှ်တုဲ သၠးဏာအခေါၚ်နကဵုမုက်မတ်အီအီကျေဝ်ကျေဝ်ညိ၊ ယဝ်ရဍေံကၠတ်သွံစကၠောန်သွက်ဂယျိုၚ်အာဗုၚ်ဂၞဴဏောၚ်တှ်ေ နူမွဲအလန်ဒှ်ၜါအလန်တုဲ သၞောဝ်ဍုၚ်နွံမံၚ်တှ်ေ ကဵုသၞောဝ်ဍုၚ်ကွာန်တံဖန်အာဗဗွဲဓဝ်ဂှ်ညိ၊ အခေတ်လၟုဟ်လေဝ် အရေဝ်အဲဟီုဏာသီုဖအိုတ်ၜိုန်ရသုၚ်စောဲစဟွံဂွံဖအိုတ်ကီုလေဝ် ၜိုတ်ထေက်ကြိုက်ကဵုအခေတ်တ္ၚဲဏံ ၜိုတ်ထေက်ကြိုက်ကဵုဟိုတ်ဖဵုအောန်ဂၠိုၚ်တုဲ ဟီုဂးတက်ကျာသောၚ်လဴအာညးသ္ကံအိုတ်ညိ။
ပွမကၠတ်ဟီုမ္ဂးဂှ်တှ်ေ မိယာဲအဲညးချူလိက်ဏံလေဝ် ဒၠောံဗ္တောန်လဝ်တွဵုတွဵုဟီုဂှ်တှ်ေ '''(ယဝ်ရၝတံကၠတ်နၚ်တှ်ေ အဲဏံရလဴစကဵုတၠဍေံကၠာအိုတ်ရ၊ သာ်ဏံမိယာဲအဲညးဟီုလဝ်တွဵုရ) ၊''' ပွမကၠတ်ကၠံက်လီဠာန်ညးတၞဟ်တံဂှ် မိယာဲမွဲဟွံဒးစိုတ်ကွေံကွေံတုဲ ၜိုန်ရကောန်ဇကုကၠောန်ဗၠေတ်ကီုလေဝ် မိယာဲမွဲရဒှ်ညးလဴစကၠာရ၊ ဟိုတ်သာ်ဏံတုဲ ပိုဲတံလေဝ် နူဘဝဍောတ်ဍောတ်တေံဖေက်မိယာဲတုဲ စိုတ်ပွမကၠတ်တံဂှ်ဟွံမွယ်ရ၊ ဇေတ်ဇေတ်ဂှ်တှ်ေ သဘာဝအဲညချူလိက်ဏံလေဝ် ပွမကၠတ်ကၠံက်တံဂှ်ဟွံမွယ်မံၚ်ရရ၊ မိယာဲဒၠောံဗ္တောန်သာ်ဏံတုဲ ညံၚ်ရဴ
ဂွံတိုန်ဂဥုဲဒြဟတ်မွဲသွုၚ်ပေၚ်ပေၚ်ရ၊ လဆောဝ်လဆောဝ်တှ်ေလေဝ် သြန်ညးတၞဟ်ဒတုံစှ်ေသၟဝ်တိၜိုန်ဇကုဆဵုညာတ်ကေတ်ကၠာကီုလေဝ် ဟွံဂံၚ်ကပှ်ဂိုၚ်ကေတ်ရ၊ လဆောဝ်တှ်ေကပှ်ကေတ်တုဲအာပ္အပ်ကဵုတၠဍေံပၠန်ရ၊ ယဝ်ရတၠဍေံဟွံမွယ်ဟွံဆဵုမ္ဂးတှ်ေ ဟွံဂံၚ်ကပှ်ကေတ်တုဲကွာ်ထၜက်ထောံရ၊ ပရေၚ်ကၠတ်ကၠံက်စနူဍောတ်ဍောတ်ယဝ်နွံသမ္တီဒးလဝ်ဂှ်တှ်ေ နွံမံၚ်ကီုညိည၊ ဘဝကောန်ၚာ်ဟီုတှ်ေ ဗက်သ္ကံရဲဟလိုၚ်တုဲ လဆောဝ်တှ်ေဒှ်စမံၚ်ကီု၊ မပ္တံကၠတ်ၜှ်စကြုက် ကၠတ်ၜှ်စသတ်ဗြဴ ကၠတ်ၜှ်စပၞဟ်တံနွံမံၚ်ကီုရ၊ ဇေတ်ဇေတ်ဂှ်တှ်ေဒှ်ဒၟံၚ်ကၠအ်ကောဒေံအမူဣစဳဇကုဖ္အိုတ်ရဂၠိုၚ်၊ '''ဇၞော်တိုန်ညိဂှ်တှ်ေ အခိၚ်စွံကဝေၚ်ဒှ်ဂှ် ပွမကၠတ်စစာၚ်စပုၚ်ဗ္တံဗီုဏံနွံမံၚ်ကီုၜိုတ်ၜါအလန် ဟး ဟး ဟး''' ဇေတ်ဇေတ်ဂှ်ဗက်ရဲရဒှ်စဂၠိုၚ်၊ သ္ကံရပရေံဟွံခိုဟ်ဟွံသေၚ်ပုဟ်ဏး ၊ ဘဝကောန်ၚာ်မုရောဟွံတီဟိုတ်ဖဵုခိုဟ်ပရေံမွဲသာ်တုဲ ညာတ်ဒးဗၠာဲဇၞော်ဇၞော်တံကၠောန်မံၚ်ဗီုဏံတုဲ ဇကုလေဝ်ကေတ်ဗီုပြၚ်တုဲဗက်မိပ်ကၠောန်အာကီုရ၊ အေယဝ်ဟီုစိုပ်အာဗၠာဲဇၞော်ဇၞော်တုဲ အခိၚ်ပိုဲဒှ်ကောန်ၚာ်တေံဂှ်တှ်ေ ဗၠာဲဇၞော်တံကြေဝ်ဝေၚ်အကြာကွာန်ဂၠံက်ဝုတ်ညးတံဟီုတုဲ၊ အခိၚ်ဗ္တံလေဝ်ညးတံကၠတ်စာၚ်ဍုန်စပုၚ်ဗ္တံရ၊ အခေတ်ကၠာတေံတှ်ေ ဗၠာဲတံကၠောန်သ္ပသာ်ဏံဂှ်ဒှ်ပရေၚ်ဓမ္မတာသဘာဝဗၠာဲမွဲရ၊ ယဝ်ရဗၠာဲလဵုဟွံကၠောန်သာ်ဏံတှ်ေ ညးတံကော်စဗၠာဲဇေတ်ဟွံသေၚ်'''(အၝောံ''')လေဝ်ဟီုတဴရ၊ '''ယဝ်ရကူစိုပ်အာတုဲ အခိၚ်ကၠာတေံတၟေၚ်ကွေံရ သီုဒးဂြိုၚ် ဟး ဟး ဟး ၊''' စိုပ်ကၠုၚ်အခေတ်တ္ၚဲဏံတုဲ နဲကဲသုၚ်စောဲဘဝကီု ဗီုပြၚ်သုၚ်စောဲဘဝလၟေၚ်လၟေၚ်တ္ၚဲတံဂှ်ကီုလေဝ် ဒးဗက်ပြံၚ်သၠာဲအာဗွဲသဘာဝအခေတ်မာန်အိုတ်ရ၊ ပွမကၠတ်ကၠံက်ဟီုမ္ဂးဂှ်တှ်ေ ဂွံဒုၚ်ဝေတ်ဒၠောံဗ္တောန်ကၠုၚ်နူမိယာဲမွဲဂၠိုၚ်နူအပါဏီရ။
(လ္ပလံၚ်ဝေၚ်အရာနာနာအိုတ်ညိဏးမိယာဲဗ္ကန်လဝ်)
ပရေၚ်လံၚ်ဝေၚ်တံဂှ် ဟွံမွယ်ကၠုၚ်နူဍောတ်ဍောတ်တေံရ၊ မူဟိုတ်ရောဟီုတှ်ေ အပါပိုဲလေဝ်ညးဟွံဝေၚ်လံၚ်တှ်ေ ပိုဲကောန်တံဏံလေဝ်ဗီုလဵုဂွံဂံၚ်ဝေၚ်ရော၊ ဗီုပြၚ်ခိုဟ်ခိုဟ်နွံတုဲ ပ္ဍဲဂကောံအိန်ထံၚ်အဲညးချူလိက်ဏံလေဝ် ပရေၚ်လံၚ်ဝေၚ်နာနာတံဂှ်ဟွံလုပ်ကၠုၚ်ပ္ဍဲဂကောံအိန်ထံၚ်အိုတ်ရ၊ သုၚ်ၜံက်တံဂှ် ၜိုန်ရအပါပိုဲမိယာဲပိုဲညးတံသုၚ်မံၚ်ကီုလေဝ် ပိုဲဏံဂှ်ပသကၠုၚ်နူဍောတ်ဍောတ်တုဲ ဟွံသုၚ်ၜံက်က္ဍုဟ်ကၠုၚ်ၜံက်လောဲလောဲရ၊ ဟီုစိုပ်အာလပါ်ၜံက်ဏံတုဲ ချပ်ဂွံနူဘဝဍောတ်ဍောတ်တေံဂှ်တှ်ေ အပါပိုဲမိယာဲပိုဲညးသုၚ်မံၚ်ၜံက်တုဲ အခိၚ်ပၟတ်ၜံက်ပၠိုတ်အာတုဲ ညးစကာကဵုဍေန်ၜံက်ရ၊ ယဝ်ဟီုကၠးကၠးတှ်ေ ၜံက်ညးတံသုၚ်လဝ်တုဲ ယဝ်ရပ်ဒးတှ်ေပသသက်ဟီုဟွံမွယ်ရ၊ ဟွံအာဍေန်ကဵုညးတံပၠန်လေဝ် ဒှ်ကောန်စကာစဝါတ်ဖေက်ညးတၞဟ်ဟီုဂးတုဲ လဆောဝ်တှ်ေအာဂၠာဲနၚ်ပၟတ်တုဲကေတ်နၚ်ကဵုညးတံဍေန်ရ၊ ယဝ်ပၟတ်ဂၠာဲဟွံဆဵုတှ်ေ
ဂွံရပ်ၜံက်ဂှ်ပသမံၚ်တုဲ ကေတ်နၚ်ဒုန်ကရေက်တုဲရပ်ကေတ်ၜံက်ညးအာဗစုက်ပၟတ်ၜံက်ရ၊ ကူချပ်ဂွံဒၞာဲဏံတုဲသီုဒးဂြိုၚ်ကွေံကွေံရ၊ '''လဆောဝ်တှ်ေ သီုညးတံကညာၚ်နၚ်ဏောၚ်ဂး ပၟတ်ၜံက်ဂှ်လ္ပကဵုပၠိုတ်ဏးဇြောတ်နၚ်ကီုဂး ၊ သုၚ်ၜံက်ဟွံဒှ် သီုပသမံၚ်တုဲဗီုလဵုဂွံဇြောတ်နၚ်ၜံက်ပၟတ်လ္ပကဵုပၠိုတ်ဂှ်ရော ဟး ဟး ဟး''' ၊ ဟိုတ်သာ်ဏံဂှ်ဒှ်ခိုဟ်ဟွံသေၚ်တုဲ အခေတ်ကၠာတေံဗီုတ္ၚဲဏံလေဝ်ဟွံသေၚ်တှ်ေ ဟီုဗျိညးတံလေဝ်ဟွံဂွံရ၊ ယဝ်ရအခေတ်တ္ၚဲဏံဏောၚ်ဟီုတှ်ေ သုၚ်စောဲဟွံဂွံရ၊ ဒှ်ဗီုပြၚ်ကဵုကောန်တံလီုအာလောဲလောဲမာန်ရ၊ ညံၚ်ရဴအပါစဴကၠုၚ်နူကၠအ်ဂှ်ကီု အကြာစဴကၠုၚ်နူကၠအ်ဂှ် ဆဵုညာတ်ဒးသ္ကံရဲညးတံသုၚ်မံၚ်အရက်သ္ၚိသ္ကဲဂၠံၚ်ဂှ်တုဲ အပါမွဲလုပ်အာတက်ဝိုၚ်အရက်ကဵုသ္ကံရဲညးရ၊ ဗီုလဵုဂွံသ္ပဇကုဒှ်ကောန်ၚာ်တုဲဒးဂ္ဇံမၚ်ဒၟံၚ်အပါစဵုကဵုညးသုၚ်တုဲရ၊ အခေတ်ပိုဲနူဍောတ်ဍောဝ်တေံဂှ်ဒှ်ကၠုၚ်ဗီုဏံတုဲ ယဝ်အခေတ်တ္ၚဲဏံလေဝ် ဇၟာပ်အပါကောန်တံကၠောန်သ္ပဟိုတ်သာ်ဏံ ဒှ်ဗီုပြၚ်ကဵုကောန်တံဟွံခိုဟ်ရ၊ '''(စဴဗကစပရောအပါသုၚ်အရက်ကဵုပရောမိသုၚ်ၜံက်ညိညသၠးအခေါၚ်ညိ)၊''' ၜိုန်ရဆဵုကၠုၚ်နဲကဲနာနာ ဟိုတ်သာ်နာနာကီုလေဝ် ၜံက်ကီုအရက်ကီု စၞစဗ္ၜူဓလူဗီုအခေတ်တ္ၚဲဏံတံဂှ် စဵုကဵုတ္ၚဲဏံလေဝ် ဟွံလုပ်စိုပ်ပ္ဍဲဘဝအဲညးချူလိက်ဏံရ၊ ယဝ်ရဟီုစိုပ်အာပရေၚ်လံၚ်ဝေၚ်ပၠန်ဏောၚ်တှ်ေ ကဵုသြန်ဝေၚ်သၟးသၟးလေဝ် ဟွံဝေၚ်ပုဟ်ဟီုမံၚ်တွဵုတွဵုရ၊ '''(လ္ၚဵုဂှ်ဟီုမံၚ် ဝါသနာဇၞော်နူဝါဗဂေါဏောၚ်ဂး)''' ၊ ဝါသနာဇၞော်နူဝါဗဂေါအရေဝ်ဍာံကီုလေဝ် ထေက်ကဵုပိုဲကောန်ဂကူတံဒးနွံကဵုဟိုတ်ဖဵုသွက်ဘဝကဵုဂၠိုၚ်ဂၠိုၚ်ညိ၊ ဝါသနာပိုဲဏံ ယဝ်ပိုဲကၠောန်ဏာထ္ၜးအာရုပ်ရဴတုဲမ္ဂးတှ်ေ လ္ပကဵုညးတၞဟ်ဒှ်ဒဒိုက် လ္ပကဵုဂကောံအိန်ထံၚ်ဇကုဒှ်ပြသၞာ လ္ပကဵုဘဝဇကုဒးလီုလာ်စာ်ထောၚ်အာတှ်ေ ကၠောန်အာဗီုဝါသနာဇကုဂှ်တှ်ေဟွံဗၠေတ်တုဲဒှ်တဴလာပ်ဗဇဴသွက်ဘဝဇကုရ၊ ယဝ်ကၠောန်တုဲ ဒးကဵုညးဂမၠိုၚ်ဒှ်ဒဒိုက် ဒးကဵုဂကောံအိန်ထံၚ်ဇကုဂၠိုၚ်ကဵုပြသၞာဒးဆဵုဒၟံၚ်ဂှ်ကီု လ္ၚဵုဂှ်ကၠောန်တုဲမိပ်တုဲ ဘဝလေဝ်လီုလာ်စာ်ထောၚ်ဟွံမွယ်ကဵုၚုဟ်မးမၞိဟ်မွဲအခိၚ်ဂျိုၚ်မံၚ်တ္ၚဲဏံဂှ်ရ၊ ဝါသနာသာ်ဏံဂှ်ဒှ်ဝါသနာဗၠေတ်ဟွံထေက်ကဵုဗက်အၚာပ်စိုတ်ကဵုလာပ်ဗဇဴသွက်ဘဝဇကုအိုတ်ညိ၊ ဝါသနာဟီုဂှ်ဇၟာပ်ညးအဲနွံဒၟံၚ်ဖအိုတ်ရ၊ မုဝါသနာဒှ်ဒှ်ရ ယဝ်ပိုဲကၠောန်ဏာတုဲ ဒှ်တသိုက်စိုတ်ဟွံမွယ်ကဵုပြသၞာဗွဲလက္ကရဴတှ်ေ ဆက်ကၠောန်အာညိဂှ်ဟွံဗၠေတ်ပုဟ်တုဲ သီုဒှ်တဴလာပ်ဗဇဴသွက်ဘဝဇကုအခိၚ်မသၠးတံဂှ်မာန်ရ။
နူစပိုဲဍောတ်ဍောတ်တေံဂှ် အခိၚ်အာဗဵုပေဲါကၠာပေဲါဟွံဂွံတိတ်ဂှ်တှ်ေ ဗက်သ္ကံရဲတုဲအာဝေၚ်လံၚ်မံၚ်ကီုညိည၊ ဝေၚ်ပြၚ်လာ် ဝေၚ်ဖေဝ်သၠာဲကဵုပ္ၚာၚ်သၠာဲကဵုခၟာဲအဒါတံ ဗက်မိပ်တုဲသ္ကံရဲကသေအ်ကၟဝ်အာဝေၚ်မံၚ်ရ၊ လဆောဝ်တှ်ေ ကျအာအိုတ်တး ခရိတ်လုပ်ရုပ်ဗဵုပေဲါလေဝ်ဟွံမွယ်၊ အခိၚ်တေံတှ်ေ ပေဲါမန်ချေတ်သိုဝ် ပေဲါမန်ထဝ်ကျာၚ်တံမြဟ်ကွေံကွေံရ၊ ဒးမၚ်ကဵုဍေံပံက်ရုၚ်မှဂွံလုပ်ဗဵုကီုရ၊ ဂွံစဴသ္ၚိလေဝ်စဴဟွံဂွံ အခေတ်တေံဂှ်အာပေဲါတှ်ေကွာ်အာနကဵုဇိုၚ်တုဲ သြန်အိုတ်ပေဲါရောဟွံဂွံဗဵု ဒးအာတိက်ဒၟံၚ်သၟဝ်ဇဵုဂၞၚ်ဝါခံက်တံလအ်တ္ၚဲဂွံတၟးတေံရ၊ လဆောဝ်တှ်ေတိက်ဒးအိက်ကဠောံလေဝ်နွံရ၊ တ္ၚဲတၟးဗက်ဂှ်တှ်ေ ဗက်စဴကၠုၚ်ညးတၞဟ်တုပ်တုပ်ကီုရ၊ စိုပ်သ္ၚိမိယာဲသၟာန်ဗဵုပေဲါခိုဟ်မံၚ်ဟာတှ်ေ ယွံဗဵုခိုဟ်မံၚ်ရဠာန်စမိယာဲပၠန်ရ၊ ဒဒှ်ဍာံသြန်အိုတ်ဟွံဂွံလုပ်ရုၚ်ဗဵုပေဲါဂှ်ဟွံဂံၚ်လဴကဵုမိယာဲရ၊ အခိၚ်တေံကောန်ၚာ်ဍောတ်ဍောတ်အာပေဲါတှ်ေဒှ်မံၚ်ဗီုဏံရဂၠိုၚ်၊ မုရောဟွံတီမွဲသာ်ခိုဟ်ပရေံတုဲ ကၠောန်မိပ်ဗက်အာသ္ကံရဲတံဗီုဂှ်အိုတ်ရ၊ ဆဂးဂှ်တှ်ေ ဇၞော်တိုန်ကၠုၚ်ဂှ်လေဝ် ပရေၚ်လံၚ်ဝေၚ်ဏံဂှ်ဟွံလုပ်ကၠုၚ်ပ္ဍဲဘဝရ၊ ဟိုတ်နူကဵုဝေၚ်ဇေတ်ဇေတ်ဟွံသေၚ် ဝေၚ်ဗက်မိပ်တုဲ အခိၚ်ဇၞော်ဏံဂှ်ဟွံမွယ်ကၠေံအာအိုတ်ရ၊ ဇေတ်ဇေတ်ဂှ်တှ်ေ အပါဇကုကောဒေံဇကု ညးတံဟွံဝေၚ်လံၚ်သြန်တုဲ ဇကုလေဝ်ဟွံဂံၚ်စောဲစပ်အာကဵုပရေၚ်တံဏံဂှ်ရ၊ ယဝ်ရဒးဟီုမၞိဟ်တ္ၚဲဏံဏောၚ်တှ်ေလေဝ် သွက်အပါကောဒေံရဲဝေၚ်လံၚ်သြန်တံဂှ် ဒးစွံသတိဒှ်မၞိဟ်ဗီုပြၚ်ခိုဟ်မွဲဟွံသေၚ်သွက်ကောန်တံသွက်ဒေံတံဂှ်ရ၊ မၞိဟ်အခေတ်လၟုဟ်လ္ၚဵုလ္ၚဵုတံဂှ်လေဝ် စဴကၠုၚ်နူဍုၚ်မ္ၚးပ္ကောံလဝ်သြန်ဂၠိုၚ်ဂၠိုၚ်တုဲ အခိၚ်ပေဲါသ္ဘၚ်ဒှ်ဂှ်ပၠေၚ်ဝေၚ်ထောံအိုတ်တးလေဝ်နွံတဴရ၊ လ္ၚဵုဂှ်အာပံၚ်ထောံကွဳလိုန်ဓါတ်လေဝ်နွံ၊ လ္ၚဵုဂှ်ကွက်လဝ်ဇုက်ထဝ်တုဲ ဇုက်ထဝ်ဂှ်ဂၠိစှ်ေဂၠိစှ်ေမိယာဲဆဵုဗၠေတ်ပကတိတုဲ ဗွဲလက္ကရဴတီကေတ်ကောန်ဗၠာဲဆာန်ဇကုကုတ်ဇုက်ပံၚ်ထောံဝေၚ်အိုတ်ရ၊ ယဝ်ရဒးဟီုဝါသနာတှ်ေ စိုတ်အဲညံၚ်ကဵုဝါသနာဟွံသေၚ်တုဲ မိက်သ္ဂောံဒှ်မၞိဟ်ဂတာပ်အခေတ် မိက်သ္ဂောံကဵုထိုၚ်သးမေၚ်ဂတးမတ်ညးဂမၠိုၚ်ကၠိုဟ်စိုတ်သာ်ဏံတုဲ ကၠောန်အာဒ္ဂေတ်ပွတံဂှ်ရ၊ ဟီုမွဲဗီုပၠန်တှ်ေ ဒှ်မၞိဟ်တမြအ်ဒှ်မၞိဟ်ကြဴလေဝ်ဟီုစဂွံရ၊ '''(ဣဏံဂှ်ဒှ်ပရေၚ်ဆဵုဂဗလဝ်ပ္ဍဲဘဝလၟေၚ်လၟေၚ်တ္ၚဲတုဲ ၜိုတ်ဆလဴထ္ၜးဂွံဒှ်ဗဟုသုတကီုရ၊ ယဝ်ရဇီုကပိုက်ဒးညးလဵုမွဲတှ်ေသၠးအခေါၚ်ညိ၊) ၊''' ပရေၚ်သုၚ်ၜံက်လေဝ်ဗီုဏံကီုရ၊ အခိၚ်အာပေဲါတှ်ေ ရဲဇကုဍေံသုၚ်ဒၟံၚ်ၜံက်တုဲ ဇကုဆဂွံဒှ်ဗၠာဲတၟိတၟိမုရောဟွံတီမွဲသာ်ပရေၚ်ဗၠာဲတှ်ေ ဒးဗက်အာကရောံဍေံတံဂှ်ရ၊ အခိၚ်ဍေံတံသုၚ်ၜံက်ဂှ်လေဝ် သီုကဵုဍေံစကာကဵုသုၚ်ကီုရ၊ '''ယဝ်ၝဟွံသုၚ်ၜံက်တှ်ေလ္ပဗက်ကရောံပိုဲညိ၊ ဗီုလဵုဂွံသ္ပရော သုၚ်တှ်ေသုၚ်ရဖေက်ဟွံဂွံဗက်ကရောံဍေံတံ၊ သုၚ်ကၠာအိုတ်ဇြောတ်ဟွံလုပ်တုဲသီုဂၠိုက်ယက်ၜံက် ဟး ဟး ဟး''' ၊ ဍေံစကာကဵုပ္တိတ်ယက်ၜံက်လပါ်မုဟ်ကီု သီုဍေံဗ္တောန်ကဵုဇြောဝ်ယက်ၜံက်တုဲၚိတ်ဖျေံညိ တုဲမှပ္တိတ်လပါ်မုဟ်ဂွံရ၊ ဗီုဗီုဏံလေဝ်ဘဝနူဍောတ်ဍောတ်ကေၚ်ဒှ်ကေၚ်ဗ္တောန်လဝ်နာနာသာ်ရ၊ စဵုကဵုတ္ၚဲဏံလေဝ် သုၚ်ၜံက်ဟွံဒှ်ဏီဖိုဟ်ရ၊ မူဟိုတ်ရောဟီုတှ်ေ ဇကုဂွံတိုန်မံၚ်ဘာတုဲ ပရေၚ်သုၚ်ၜံက်ဟီုဂှ် အ္စာတံညးဟွံကဵုအခေါၚ်သုၚ်တုဲ ဇကုလေဝ်ဟွံဂံၚ်သုၚ်ရ၊ ခိုဟ်မွဲဗီုပၠန်ဂှ်တှ်ေ သ္ကံရဲအဲတှ်ေမၞိဟ်ဗြဴဗြဴတံသၟးရနွံဂၠိုၚ်တုဲ ပရေၚ်လီုလီုတံဂှ်လေဝ်အောန်ကၠုၚ်ကီုဂှ်ဒှ်မာန်ဟာဟွံတီရ၊ မိယာဲလေဝ်ညးဗ္တောန်ဟီုမံၚ်တွဵုတွဵုကီု ဘဝကွးဘာတှ်ေသုၚ်ၜံက်ဟွံဂွံဏး လံၚ်ဝေၚ်ဟွံထေက်ဏး သာ်ဏံလေဝ် ဖေက်မိယာဲစိုတ်ဟွံမိပ်တုဲ ဇကုလေဝ်ပရေၚ်ညးဟွံကဵုအခေါၚ်နာနာသာ်တံဂှ်
ဟွံဂံၚ်ဂံါယာဇိုၚ်လုပ်အာရ၊ ယဝ်ရဒးဟီုနဲကဲဂတာပ်အခေတ်ဏောၚ်တှ်ေ ဇကုပိုဲဘဝပိုဲဒးဆာန်ဂၠိုၚ်ဂၠိုၚ်တှ်ေ ပရေၚ်လီုလာ်စာ်ထောၚ်ဗီုအခေတ်တ္ၚဲဏံဒးဆဵုဒၟံၚ်ဂှ်လေဝ် အောန်ကၠုၚ်ပ္ဍဲဘဝပိုဲတံမာန်ရ။
ပရေၚ်လံၚ်ဝေၚ်ကီု ပရေၚ်လီုလီုအရာဖဵုဍေံအောန်သွက်ဘဝနာနာသာ်တံဂှ် ဒှ်ကမၠောန်ဇၟာပ်မၞိဟ်ဒးကၠောန်ဖအိုတ်လေဝ်ဟွံသေၚ်တုဲ သွက်မၞိဟ်ကၠောန်ဗက်လုပ်အာဒၞက်တံဂှ်လေဝ် ဟိုတ်နူကဵုသတိလီု ဟိုတ်နူကဵုဟွံမာန်စိုတ်ဇကုတုဲ ဗက်အာဍာ်ဇၟောဝ်အခေတ် ကြအ်အာထိုၚ်သးအရာဗၠေတ်ဗၠေတ်ဖဵုနွံမွဲချိန်ခဏတံဂှ်တုဲ ဟီုအာနကဵုဝါသနာလေဝ်နွံ၊ ဟီုအာကၠုၚ်နူမဇအဆက်လေဝ်ဂွံမိၚ်အိုတ်ရ၊ ဇေတ်ဇေတ်ဂှ်တှ်ေ ကၠုၚ်နူကဵုဟိုတ်ပိုဲဏံဟွံမာန်စိုတ်ဇကုအိုတ်ရဂှ် ထေက်ကဵုဒးတီလဝ်ကၠးကၠးညိ၊ ပရေၚ်လံၚ်ဝေၚ်ဟီုမ္ဂးဏံဂှ် ဖန်ဗဒှ်ကဵုဒ္ဂေတ်ပွစဳပၞောန်မၞိဟ်မွဲလီုအာတုဲ မၞိဟ်တံဂှ်လေဝ် ဟွံမွယ်ၚုဟ်မးပ္ဍဲမတ်ညးလောကတံရ၊ ညံၚ်ရဴဇကုဟွံဆာန်ဘဝဇကုကီုတုဲ ညးလဵုမွဲဂွံဆာန်ဘဝဇကုဂှ်ရော၊ အ္စာပညာစိုတ်တံညးကေၚ်လဝ်နွံဒဿနမွဲပိုဒ်ဂှ်တှ်ေ '''(ကၠာဟွံဂွံဆာန်ညးတၞဟ်ဏီဂှ် ဇကုပိုဲဏံဂှ်ဒးဆာန်ကၠာညိ၊)''' မအရေဝ်ဒဿနဏံကဵုသွဟ်ခိုဟ်ကွေံကွေံရ၊ ကၠာဟွံဂွံဆာန်ညးတၞဟ်ဏီဂှ် ဇကုပိုဲဏံဂှ်ဒးဆာန်ကၠာဂှ် ယဝ်ညးလဵုမွဲဟွံကၠိုဟ်ဟွံကၠးမ္ဂးတှ်ေ ယဝ်တက်ကေတ်ကျာကဵုညးချူလိက်ဏံတှ်ေ ဂွံသွဟ်ပေၚ်ပေၚ်ဏောၚ်ဒုၚ်တာလျိုၚ်ရ၊ ယဝ်ဒးချူပ္ဍဲတၞးလိက်ဏံဖအိုတ်မ္ဂးတှ်ေ လိက်မွဲအုပ်ချူစွံဟွံအိုတ်ပုဟ်၊ ဟိုတ်ဒှ်သာ်ဂှ်တုဲ ယဝ်ပိုဲတံဆာန်ဘဝပိုဲ ဆာန်မိမပိုဲ ဆာန်ကောဒေံမိတ်သဟာဲပိုဲ ဆာန်ဂကူဘာသပိုဲမ္ဂးတှ်ေ ပရေၚ်လံၚ်ဝေၚ်ကီု ပရေၚ်လီုလီုနာနာသာ်တံဂှ် ကဵုဟိုတ်ဖဵုလပါ်ပရေံသွက်ဘဝပိုဲဏံဗွဲမဂၠိုၚ်တုဲ ထေက်ကဵုပိုဲတံဒးပဲါစ္ဍးတိတ်အာသ္ၚောဲသ္ၚောဲအိုတ်ညိ၊ ပရေၚ်တံဏံယဝ်ပိုဲကွာ်ဂံါလုပ်အာတုဲ ဘဝပိုလေဝ်ဟွံမွယ်ကဵုတသိုက် ဂကောံအိန်ထံၚ်ပိုဲတံလေဝ်ဟွံမွယ်ကဵုတသိုက် မိမကောဒေံမိတ်သဟာပိုဲတံဂှ်လေဝ် ညးတံဟွံမွယ်ကဵုတသိုက်အိုတ်တုဲ သီုကဵုဘာသာဂကူလေဝ်ယၟုလီုဒၟာနူကဵုပိုဲဏံမွဲဒှ်ဒၟံၚ်မၞိဟ်ဗီုဏံရ။
မိဟီုမ္ဂးဂှ်ဒှ်ညးသိုင်မာန်ပ္တိုန်လဝ်ဂၠးတိဏံ၊
မိဟီုမ္ဂးဂှ်ဒှ်ညးသိုၚ်မာန်ပ္တိုန်လဝ်ဂၠးတိဇၞော်ဏံတုဲ မၞိဟ်လ္တူဂၠးတိဏံပရေံကီုခိုဟ်ကီုဂှ်တိုန်ဒှ်ကဵုမိယာဲမွဲရ၊ ဟိုတ်ဒှ်သာ်ဂှ်တုဲ မိယာဲမွဲသိုၚ်မာန်ပတိုန်လဝ်ဂၠးတိဏံဂှ်လေဝ်ဟွံဗၠေတ်ပုဟ်၊ လ္တူဂၠးတိဏံ ယဝ်မိယာဲမွဲဟွံမွယ်မ္ဂးတှ်ေ အဲညးချူလိက်ဏံဂွံဆက်ချူဒၟံၚ်လိက်ပ္ဍဲတ္ၚဲဏံဂှ်လေဝ်ဒှ်အာဟွံမာန်ရ၊ ဂုဏ်မိယာဲမွဲဂှ်ဇၞော်တဴဗွဲမလောန်တုဲ မုပိုဲကောန်တံကၠောန်ကၠောန်တံဂှ်လေဝ် လ္ပကဵုမိယာဲမွဲဒးစံၚ်တူစိုတ်တွဵုညိ၊ မုပိုဲကောန်တံကၠောန်ကၠောန်ဂှ်လေဝ် ဒးကူစိုပ်ဒၟံၚ်လပါ်မိမတံလၟိုန်အခိၚ်ဏောၚ်တှ်ေ ပိုဲဏံဂှ်ဒှ်မၞိဟ်ဆာန်မိမမွဲတုဲ ပြသၞာနာနာပ္ဍဲဘဝလၟေၚ်တ္ၚဲတံဂှ်လေဝ်သ္ၚောဲခြာအိုတ်အးအာမာန်ရ၊ ကောန်ခိုဟ်ဟီုမ္ဂးဂှ်လေဝ် ဟွံကၠောန်ကဵုမိမတံဒးဒှ်ဒဒိုက်စိုတ်မာန်ရ၊ မုပိုဲတံကၠောန်ကၠောန်ဂှ်လေဝ် ပိုဲကူစိုပ်ဂွံဒၟံၚ်လပါ်မိမၜါတံလၟိုန်တုဲ လပါ်ပရေံဟွံခိုဟ်တံဂှ်လေဝ် ပိုဲဟွံဂံၚ်ကၠောန်အိုတ်တုဲ ဂွိၚ်ဖေက်မိမၜါတံစိုတ်ဟွံမိပ်ဒၟာနူကမၠောန်ပိုဲကောန်တံတုဲ ဣဏံဟေၚ်ရကုသဵုခိုဟ်အိုတ်သွက်မိမၜါတံရ၊ ကောန်ဒှ်မၞိဟ်ခိုဟ်မွဲဟီုဂှ် ဗဒှ်ကဵုမိမၜါပဳတိသက်ဟီုဟွံမွယ်ရ။
ကောန်ကၠဵုကောန်စာၚ်တံဂှ်အခေါင်ဟွံမွယ်ဂွံကလေၚ်ရော်ဂုဏ်သွက်မိမၜါကီုရ၊ ဆဂး ကောန်စာၚ်ကောန်ကၠဵုတံဂှ် ဟွံဂွံကၠောန်ကၠုင်လ္တူမိမၜါဍာ်ရမတ်ဒးဒတုံစှ်ေအာမာန်ရ၊ ကောန်မၞိဟ်အခေါၚ်နွံဂွံရော်ဂုဏ်လ္တူမိမၜါရ၊ ဆဂး ကောန်မၞိဟ်ကၠောန်ကၠုၚ်လဝ်လ္တူမိမၜါဍာ်ရမတ်ဒးဒတုံစှ်ေကၠုၚ်နွံတဴဗဝ်သအဝ်ရ၊ ကောန်စာၚ်ကောန်ကၠဵုတံဟွံကလေၚ်ကိတ်မိမၜါကီုရ၊ တ္ၚဲဏံကောန်မၞိဟ်ကေၚ်ကိတ်ကၠုၚ်ကဵုမိမၜါပေၚ်ပြးဍုၚ်ကွာန်ကီုရ၊ ဟိုတ်ဒှ်သာ်ဂှ်တုဲ ၜိုန်ရပိုဲတံတီမိယာဲမွဲဒှ်ညးသိုၚ်မာန်ပ္တိုန်လဝ်ဂၠးတိဏံကီုလေဝ် လဆောဝ်လဆောဝ်တှ်ေ ပိုဲကောန်တံဒးကဵုမိမၜါဍာ်ရမတ်ဒးဒတုံစှ်ေမံၚ်ဏီဟာ၊ ထေက်ကဵုညးတံဒးဂွံတသိုက်ဂှ်အခိၚ်စိုပ်ကၠုၚ်ယျဏောၚ်ကောန်ဂကူဗုဒ္ဓဘာသာတံ။
လ္ပကၠောန်ကဵုမိမၜါဍာ်ရမတ်ဒးဒတုံပြဟ်စှ်ေအာညိ၊
ကောန်ကၠဵုအခေါၚ်ဟွံမွယ်ဂွံကလေၚ်ရော်ဂုဏ်လ္တူမိယာဲမွဲရ၊ '''(ဒၞာဲဏံဒးဟီုမိယာဲမွဲရ၊ ဟိုတ်နူကောန်ကၠဵုဍေံတံတီမိယာဲဍေံမွဲရလွဳပရာကၠုၚ်လဝ်ဍေံတံ၊ အပါမွဲကောန်ကၠဵုတံဟွံတီပုဟ်)''' ၊ ဆဂး ကောန်ကၠဵုဟွံကေၚ်ကၠောန်ကဵုသွက်မိယာဲဍာ်ရမတ်ဒးဒတုံပြဟ်စှ်ေအာကီုရ၊ ပိုဲကောန်မၞိဟ်ဏံၜိုန်ရဂွံအခေါၚ်ကလေၚ်ရော်ဂုဏ်လ္တူမိမၜါနွံဂၠိုၚ်နူကောန်ကၠဵုကီုဂှ်လေဝ် ဣဏံလေဝ်ကၠောန်ကၠုၚ်ကဵုမိမၜါတံဍာ်ရမတ်ဒးဒတုံပြဟ်စှ်ေအာဂှ်လေဝ်နွံတဴဟွံအောန်ရ၊ ယဝ်ရဟီုကၠးကၠးတှ်ေ ကောန်မၞိဟ်ဏံပရေံယုတ်နူကဵုကောန်ကၠဵုတံဏီရ၊ ဟိုတ်ဂှ်ရတှ်ေ ညးဂှ်လဵုမွဲ ကေၚ်ကၠောန်လဝ်လ္တူမိမၜါဇကုနွံကီုရော။
နူပိုဲဍောတ်ဍောတ်တေံဂွံမိၚ်ညးဇၞော်ဇၞော်ကေၚ်ဟီုလဝ်ဂှ် ဒၟာနူကဵုကောန်တံတုဲဍာ်ရမတ်မိမဒးဒတုံစှ်ေအာမ္ဂးတှ်ေ ကောန်တံဂှ်ပၠန်ရဒးစှ်ေနရက်ဏောၚ်၊ ၜိုန်ရကောန်တံကၠောန်ကၠုၚ်ဟွံမွယ်ကဵုတသိုက်စိုတ် ဟွံမွယ်ကဵုဖဵုခိုဟ်တံဂှ်ကီု ဒးဂွကဵုညးဍုၚ်ကွာန်တံအခိၚ်လဴစိုပ်အာပရောကောန်ဇကုဏောၚ်တှ်ေ မိယာဲမွဲဍာ်ရမတ်ဇွောဝ်အေၚ်ဟွံမာန်တုဲ ဓဝဲါဂှ်ဂစာန်ဇုက်ထောံဍာ်ရမတ်တုဲအေၚ်လဝ်ရ၊ ဂွိၚ်ဖေက်ကောန်တံဒးဒတုံစှ်ေနရက်တုဲ မိယာဲမွဲဟွံဂံၚ်လရိုဟ်ပတိတ်နၚ်ကဵုညးတၞဟ်ဆဵုရ၊ '''(ယဝ်ဍာ်ရမတ်မိယာဲဒတုံပြဟ်စှ်ေတှ်ေကောန်တံစှ်ေနရက်ဏောၚ်ဂး)''' ဟိုတ်သာ်ဏံလေဝ် မိယာဲဆာန်မွဲအေၚ်လဝ်ဂၠိုၚ်ကဵုအလန်ရိုဟ်လၟိဟ်ဟွံမာန်ရ၊ ဓဝ်ဆာန်မိယာဲမွဲဇၞော်လောန်လ္တူကောန်တံသက်ပ္တောံၜိုတ်ဟွံမာန်ရ၊ တသိုက်သွက်မိမၜါၜိုန်ကောန်တံဟွံပအပ်ကဵုညးတံကီုလေဝ် ဒဒိုက်သွက်ကောန်တံတၟာဒဳရုဲလေဝ်ဟွံမွယ်ပ္ဍဲစိုတ်မိမတံရ၊
ယဝ်ရဟီုစိုပ်အာဍာ်ရမတ်ဏောၚ်တှ်ေ ယဝ်ရမိယာဲတံဒးလရိုဟ်ဍာ်ရမတ်ဒတုံပြဟ်ဏောၚ်တှ်ေ ပြသၞာတံဂှ်လေဝ်ဟွံအောန်ပုဟ်ရ၊ မူဟိုတ်ကောန်တံဒးကၠောန်ကဵုမိမတံဍာ်ရမတ်ဒးဒတုံစှ်ေဂှ်ရော၊ ယဝ်ရရံၚ်ဟိုတ်မ္ဂးတှ်ေဂၠာဲဟွံဆဵုတုဲ အရာနာနာသွက်ညးတံဍာ်ရမတ်ဒးဒတုံပြဟ်စှ်ေအာဂှ်လ္ပကၠောန်ကဵုမိမၜါတံအိုတ်ညိ၊ ဒးဒှ်ကောန်ဆာန်မိမၜါအိုတ်ညိ၊ အခိၚ်ညးတံကူစိုပ်ဂွံအာလပါ်ကောန်တံမ္ဂးတှ်ေ ဍာ်ရမတ်ဒးဒတုံတွဵုဂှ်လေဝ်လ္ပကဵုဒှ်အိုတ်ညိ။
မိက်သ္ဂောံကဵုသၟတ်မန်ပိုဲတ္ၚဲဏံသီုညးဖ္အိုတ်တံဂှ် ကောန်ၚာ်ဝုတ်ဝုတ်ဗၠာဲဗၠာဲတံ မုပိုဲတံကၠောန်ကၠောန် ဒးကူစိုပ်အာဗွဲကိုပ်ကၠာဂှ်တှ်ေမိမၜါပိုဲဂှ်အိုတ်ညိ၊ အခိၚ်တိုန်ကတ်ဗ္တောန်ပညာလေဝ် ညံၚ်သ္ဂောံစိုပ်အာတိုၚ်ပ္ကဴပြဟ်ပြဟ်မာန်ဂှ်ဆက်ဂစာန်အာအိုတ်ညိ၊ သွက်ရဲညးကၠောန်ဒၟံၚ်ကမၠောန်ခိုဟ်ခိုဟ်တံဂှ်လေဝ် ဒးကူစိုပ်ဂွံဒၟံၚ်တွဵုဟီုဂှ် ပိုဲကောန်တံဂှ်ဒှ်ဂဥုဲဒြဟတ်မွဲသွုၚ်သွက်မိမၜါတံရ၊ ယဝ်ရကောန်တံလ္တူလိုက်ဂၠးတိဏံသီုဖ္အိုတ် ဒှ်ကၠုၚ်ကောန်ခိုဟ်သွက်မိမၜါဏောၚ်တှ်ေ လိုက်ပိုဲမံၚ်ဒၟံၚ်တ္ၚဲဏံဂှ်လေဝ် နွံကၠုၚ်ကဵုဓဝ်ဆာန်ဓဝ်ဂီုကၠီုညးသ္ကံအိုတ်တုဲ ပြသၞာကေတ်မာန်အံၚ်ဇၞးပြိုၚ်ပ္ကာန်ညးသ္ကံဂှ်လေဝ်အိုတ်အောန်အာမာန်ရ၊ အခေတ်တ္ၚဲဏံဂှ်လေဝ် ယဝ်ရကောန်တံဒှ်မၞိဟ်ခိုဟ်သွက်မိမၜါကီု ယဝ်ကောန်တံဆာန်မိမၜါကီုတှ်ေ ဂဥုဲၜူမာဲနာနာ'''(တ္ၚဲဏံမိမတံဒးဖေက်အိုတ်ရဂှ် ဂဥုဲတမြအ်ကော်ဂဥုဲချေံဏံရ၊)''' ၊ ဍေံတံဟီုဂှ်ဗက်အခေတ်တုဲသုၚ်စောဲအာဂး ၊ လ္ၚဵုဂှ်ဟီုမံၚ် ယဝ်သုၚ်ဟွံလုပ်တှ်ေမၞိဟ်တြုံဟွံသေၚ်ဂးအိုတ်ရ၊ ညံၚ်ကဵုဍေံတံဂတးထောံအိုတ်တးရအခေတ်တ္ၚဲဏံ၊ လပါ်ခိုဟ်ဂှ်ဒှ်မၞိဟ်တြုံဟွံဇေတ် အစောံစရာဲမၞိဟ်တြုံဟွံမွယ်၊ လပါ်လီုလီုညံၚ်ရဴဟရာဲဂၠံၚ်တံဂှ်လေဝ် ဍေံတံထိုၚ်သးဟီုစဂတာပ်အခေတ်ဒှ်မၞိဟ်တၟေၚ်အိုတ်ရ၊ '''(စိုတ်ဍေံတံရလေဝ်''') ၊ သၟတ်တံသီုညးဖအိုတ် ဆဵုကေတ်ဟိုတ်ဖဵုသာ်ဏံတုဲ လ္ပကဵုကွာ်တိတ်အာနူအရေဝ်မိယာဲဗ္တောန်လဝ်တံဂှ်အိုတ်ညိ၊ အရေဝ်မိယာဲဗ္တောန်လဝ်တံဂှ်လေဝ် ပံၚ်နှဴအာနကဵုအခိၚ်အခေတ်ကာလဒေသတုဲ သုၚ်စောဲစကာဗဂဵုလဟဵုအာညံၚ်ဂွံဂတာပ်အခေတ်အိုတ်ညိ၊ စိုတ်သၟတ်တံလေဝ် ဒးနွံကဵုမေတ္တာကဵုဂၠိုၚ်ဂၠိုၚ်အိုတ်ညိ၊ ပိုဲတံဒှ်ကၠုၚ်ကောန်ဗုဒ္ဓဘာသာမွဲဘဝဏံဂှ် နွံကဵုၚုဟ်မးသက်ပ္တောံၜိုတ်ဟွံမွယ်ရ၊ နဲကဲနာနာသွက်ဘဝပိုဲမၞိဟ်ဂျိုၚ်တဴဒၟံၚ်တ္ၚဲဏံဖအိုတ်ဂှ်လေဝ် နွံဒၟံၚ်ပ္ဍဲဂၠံၚ်ဍာန်အရေဝ်ဗ္တောန်အပါပိုဲဗုဒ္ဓဖအိုတ်ရ၊ ၚုဟ်မးဇၞော်အိုတ်သွက်ဘဝဂှ်နွံဒၟံၚ်ပ္ဍဲသ္ၚိပိုဲရတှ်ေ သုၚ်စောဲစကာညံၚ်ဂွံဂတာပ်အခေတ်အိုတ်ညိအဴကောန်ဂကူတံ။ '''( အုပ်နိဂီုတုဲဆဝွံကၠာရအဴ၊ )'''
လိက်အုပ်ဏံ တ္ၚဲဏံချူလဝ်ဗွဲက္ဍန်ရ၊ သွက်တ္ၚဲဂတးတေံဟီုဂှ် ဆက်ချူဗပေၚ်စုတ်အာသိုက်သိုက်ကီုရ၊ စဵုကဵုဒှ်လိက်အုပ်ခိုဟ်ခိုဟ်မွဲအုပ်မာန်ဂှ် ကောန်ဂကူမန်တံလေဝ်မၚ်စၟဳဗှ်အိုတ်ညိ၊ မလိက်ဗၠေတ်ဒးပဵုယအ်ယဝ်နွံတှ်ေ ပဠေဝ်တုဲဗှ်အာအိုတ်ညိ၊ တၚ်ဂုဏ်ရအဴ။
